📊 НАРХ-БАРҚАРОРЛИК ВА ОЗИҚ-ОВҚАТ ХАВФСИЗЛИГИ — ДЕПУТАТЛИК НАЗОРАТИ ДАВОМ ЭТМОҚДА
"Озиқ-овқат маҳсулотининг сифати ва хавфсизлиги тўғрисида"ги Ўзбекистон Республикаси Қонуни (1997 йил 30 август, 483-I-сон) талаблари ижросини таъминлаш ҳамда аҳолини сифатли ва хавфсиз озиқ-овқат маҳсулотлари билан таъминлаш ҳолатини ўрганиш мақсадида Халқ депутатлари Наманган тумани Кенгашининг 6-Чорбоғ сайлов округи депутати Отабек Юсупов ҳамда Кенгаш котибияти бош мутахассиси Мансур Қурбанов томонидан тумандаги бозорларда депутатлик назорати ўтказилди.
Ўрганиш жараёнида аҳоли кундалик истеъмол қиладиган энг зарур озиқ-овқат маҳсулотларининг нарх-навоси, маҳсулотлар захираси, савдо расталаридаги таъминланганлик даражаси, шунингдек, маҳсулотларнинг сифати ва хавфсизлигига оид талабларга риоя этилиши ҳолати атрофлича кўздан кечирилди.
Депутатлик назорати давомида аниқланган ҳолатлар юзасидан масъул ташкилотлар билан фикр алмашилиб, аҳолини сифатли озиқ-овқат маҳсулотлари билан узлуксиз таъминлаш, нархлар барқарорлигини сақлаш ҳамда истеъмолчилар ҳуқуқларини ҳимоя қилиш бўйича тегишли таклиф ва тавсиялар билдирилди.
Халқ депутатлари Наманган тумани Кенгаши томонидан аҳоли манфаатларини таъминлаш, озиқ-овқат хавфсизлигини мустаҳкамлаш ва бозорларда қонунчилик талаблари ижросини таъминлаш юзасидан депутатлик назорати изчил давом эттирилади.