Ғәрезсизлик – бул миллетимиздиң еркинлиги ҳәм жарқын келешегиниң тийкары

Өзбекстан Республикасы Ғәрезсизлигиниң 35 жыллық уллы ҳәм қутлы байрамы қарсаңында мәмлекетимиздиң жоқары сыйлықларынан бири – "Өзбекстан Республикасы Ғәрезсизлигиниң 35 жыллығы" көкирек белгиси менен сыйлықланғаным жүрегимде шексиз мақтаныш ҳәм терең жуўапкершилик сезимлерин оятпақта.
Ғәрезсизлик – бул миллетимиздиң еркинлиги ҳәм жарқын келешегиниң тийкары болып есапланады.
Өткен 35 жыл даўамында елимизде әмелге асырылған кең көлемли реформалар, жаңаланыўлар ҳәм дөретиўшилик жумыслар себепли бүгинги күнде өзгерген, раўажланған Жаңа Өзбекстанды шын кеўлимизден сезип турамыз. Усындай тарийхый байрам қарсаңында азғана мийнетимниң итибарға алынғанлығы мен ушын шексиз мәртебе.
Бул жоқары сыйлықты – ең әўеле, жеке өзимниң мийнетимниң нәтийжеси деп емес, ал Шымбай районының аўызбиршиликли халқының, исенимли сайлаушыларымның елимиз раўажланыўы жолында биргеликте алып барып атырған нәтийжели мийнетине берилген жоқары баҳа деп билемен.
Бул жоқары сыйлықты – ең әўеле, Мамлекетимиз басшысының Халық депутатлары жумысын қоллап-қуўатлап, жергиликли Кеңеслер ўәкилликлерин кеңейтиўге қаратып атырған итибарына, Шымбай районының әзиз халқы ҳәм сайлаушыларымның маған билдирген исеними менен ҳәр бир реформада берген сүйенишине, районымызды социаллық-экономикалық раўажландырыў жолындағы биргеликтеги аўызбиршиликли мийнетимизге берилген мүнәсип баҳа деп билемен ҳәм өз миннетдаршылығымды билдиремен.
Маған тапсырылған бул жоқары сыйлық – мени жаңа шеклерге, елимиздиң гүллеп-жаснаўы ҳәм халқымыздың абаданлығы жолында буннан да белсенди, пидайылық пенен хызмет етиўге шақырады. Билдирилген жоқары исенимди әмелий жумысларым, халық мәпин қорғаў жолында бар билимим ҳәм күш-жигеримди жумсайман.
Елимиз тыныш ҳәм аспанымыз ашық болсын! Ғәрезсизлигимиздиң 35 жыллық байрамы ҳәр бир шаңараққа куўаныш, берекет ҳәм бахыт-ығбал алып келсин!

Абадан УТЕПБЕРГЕНОВА,
4-санлы "Кеңес" сайлаў округинен Халық депутатлары Шымбай районлық Кеңеси депутаты, ӨзХДП депутатлық топары ағзасы.