Bárshemizge málim, mámleketimizde jergilikli Keńeslerdiń mámleket hám jámiyet turmısındaǵı ornı hám rolin asırıwǵa qaratılǵan sistemalı jumıslar alıp barılmaqta. 

 Áne sonday jumıslardıń dawamlılıǵın támiyinlew hámde aldaǵı waqıtları aldımızda turǵan jumıslardı belgilep alıw maqsetinde Ózbekstan Respublikası Prezidentiniń 2025-jıl 23-iyun kúngi PP-98-sanlı Pármanı qabıl etilgenligin atap kórsetiw lazım. 

Usı Párman menen jergilikli Keńesler iskerligin rawajlandırıw boyınsha 2030-jılǵa shekem ámelge asırılatuǵın jumıslar belgilep alındı hám bul boyınsha óz aldına Koncepciya tastıyıqlandı. 

Párman hám Koncepciyada xalıq wákilleriniń tıyıp turıw hám qadaǵalaw wákilliklerin asırıwǵa óz aldına itibar qaratıldı. 

Buǵan bir ǵana mısal, Párman menen jergilikli Keńeslerdiń Reglament hám deputatlıq ádebi máseleleri boyınsha turaqlı komissiyasına Keńes qararı menen lawazımǵa
tastıyıqlanatuǵın, tayınlanatuǵın, lawazımǵa tayınlanıwında Keńes razılıǵı alınatuǵın lawazımlı shaxslardıń da ádep-ikramlılıq normaların buzǵanlıq boyınsha islerdi kórip shıǵıw huqıqın beriw názerde tutılmaqta. 

Buǵan ne sebep bolǵan? 

Ámeliyattan bilgenimizdey, jergilikli Keńesler tárepinen tiyisli basshılardıń málimleme yamasa esabatın esitiwde ayırım basshılar tárepinen bul máselege juwapkershiliksizlik penen qaraw jaǵdayları ushıramaqta. 

Mısalı, ayırım basshılar nızamshılıqta belgilengen múddetlerde óz málimlemesi yamasa esabatın usınbawı, usınıp atırǵan málimleme yamasa esabatta tiyisli
maǵlıwmatlardıń berilmeytuǵınlıǵı, jergilikli Keńesler sessiyalarına jeke ózi kelmewi sıyaqlı unamsız jaǵdayları da ushırasıp turıptı. 

Pikirimizshe, usı norma jergilikli Keńes qararı menen lawazımǵa tayınlanatuǵın yamasa lawazımǵa tayınlanıwında Keńes razılıǵı alınatuǵın lawazımlı adamlardıń
jergilikli Keńes aldındaǵı juwapkerliginiń asıwına alıp keledi. 

Usınıń menen birge Keńeslerdiń qadaǵalaw wákilliklerin kúsheytiwge xızmet etiwshi taǵı bir normaǵa itibar qaratpaqshıman. 

Bul jergilikli Keńeslerde “Keńes saatı” dep atalıwshı jańa qadaǵalaw formasınıń engiziliwi bolıp tabıladı. Oǵan kóre, jergilikli Keńeslerde deputatlar hám jámiyetshilik wákilleri qatnasıwında atqarıwshı hákimiyat organları basshılarınıń ayırım aktual sociallıq máseleler boyınsha esabatı esitiledi. 

 Bul bolsa óz gezeginde xalıq wákilleriniń deputatlıq hám jámiyetshilik qadaǵalawın kúsheytiwge xızmet etedi. 

Xalıq deputatları Taxtakópir rayonlıq Keńesi deputatı Jusipov Timur Shınıbaevich