Sessiyada fuqarolardan kelib tushayotgan murojaatlar hamda hududlarda mavjud infratuzilmaviy muammolarni bartaraf etish maqsadida jamg‘arma mablag‘lari hisobidan amalga oshirilishi rejalashtirilgan loyihalar ko‘rib chiqildi.

Qarorga muvofiq, jamg‘arma mablag‘lari hisobidan umumiy qiymati 1 milliard 51,4 million so‘mlik 3 ta muhim ijtimoiy loyiha moliyalashtirilishi belgilandi.

Jumladan:

Uvaysiy mahallasidagi ko‘p qavatli uyda sodir bo‘lgan tabiiy gaz chaqnashi oqibatlarini bartaraf etish va zarar ko‘rgan konstruksiyalarni mustahkamlash ishlari uchun mablag‘ ajratiladi;

Bog‘dod ko‘chasida asfalt qoplamasi yotqizish, piyodalar yo‘laklarini qurish hamda irrigatsiya tarmoqlarini barpo etish orqali aholi va tadbirkorlar uchun yanada qulay infratuzilma yaratiladi;

Qo‘rg‘oncha mahallasidagi eskirgan ichimlik suvi tarmoqlarini yangilash orqali aholini sifatli ichimlik suvi bilan ta’minlash darajasi yaxshilanadi.

Sessiya yakunida ajratilayotgan mablag‘lardan maqsadli va samarali foydalanish, loyihalarni belgilangan muddatlarda yakunlash hamda aholi murojaatlarida ko‘tarilgan muammolarni bartaraf etish bo‘yicha mas’ullarga tegishli vazifalar yuklatildi.