O‘zbekiston Respublikasi Oliy Majlisi Senati Kengashining 2025-yil 14-yanvardagi “Hududlarni rivojlantirish hamda aholi muammolarini hal etishda mahalliy Kengashlar deputatlari va senatorlarning “mahalla yettiligi” bilan o‘zaro hamkorligini yanada kuchaytirish chora-tadbirlari to‘g‘risida”gi KQ-35-V-sonli qarori ijrosini ta’minlash maqsadida joylarda tizimli ishlar amalga oshirilmoqda. Mazkur qaror ijrosi yuzasidan Xalq deputatlari Parkent tuman Kengashi deputatlarining tuman hokimligi mas’ul rahbarlari bilan hamkorlikda saylangan okruglarda o‘tkaziladigan uchrashuvlar reja-jadvaliga muvofiq, tuman Kengashiga 4-Bo‘ston saylov okrugidan saylangan deputat Usipxodjayev Yerlan Ormanovich o‘z okrugidagi saylovchilar bilan uchrashuv o‘tkazdi. Uchrashuv davomida deputat saylov okrugi tarkibiga kiruvchi mahalla fuqarolar yig‘inlarida 2025-yil davomida amalga oshirilgan ishlar yuzasidan axborot berdi. Jumladan, hududni obodonlashtirish, ijtimoiy infratuzilmani yaxshilash hamda aholi murojaatlari asosida amalga oshirilgan ishlar haqida ma’lumot taqdim etildi. Tadbirda tuman Kengashi kotibiyati mudiri Berdiqulova Mavluda Tojiddinovna hamda tegishli kommunal soha tashkilotlari mutasaddilari ishtirok etdi. Uchrashuv yakunida aholi tomonidan ko‘tarilgan mahalladagi yechimini kutayotgan masalalar atroflicha muhokama qilinib, ularni bartaraf etish yuzasidan zarur chora-tadbirlar rejasi belgilab olindi.