Xalq deputatlari Qo‘qon shahar Kengashida Ekspert-maslahat guruhining navbatdagi yig‘ilishi bo‘lib o‘tdi. Unda Xalq deputatlari Qo‘qon shahar Kengashi raisi O‘.Tojiyeva hamda Kengash kotibiyati mudiri A.Nosirov ishtirok etdi.

Yig‘ilish davomida Xalq deputatlari Qo‘qon shahar Kengashining navbatdagi sessiyasi kun tartibiga kiritilishi rejalashtirilgan masalalar atroflicha ko‘rib chiqildi. Qaror loyihalarining amaldagi qonunchilik talablariga muvofiqligi, ularning huquqiy asoslari, amaliy ahamiyati hamda ijro mexanizmlarining samaradorligi yuzasidan ekspertlar tomonidan fikr va mulohazalar bildirildi.

Muhokamalar jarayonida kun tartibidagi masalalarni yanada takomillashtirish, ularning mazmunini boyitish hamda qabul qilinadigan qarorlarning amaliy natijadorligini oshirish bo‘yicha qator taklif va tavsiyalar ilgari surildi.

Shuningdek, Kengash faoliyatida ochiqlik va shaffoflikni ta’minlash, qabul qilinayotgan qarorlarning puxta huquqiy ekspertizadan o‘tkazilishi hamda ularning amaliyotdagi ijrosini samarali tashkil etish masalalariga alohida e’tibor qaratildi.

Xalq deputatlari Qo‘qon shahar Kengashi