Xalq deputatlari Bo‘zatov tumani Kengashining 4-sonli "To‘rtko‘l" saylov okrugidan (MTDP) saylangan deputat A. Jangaboyeva tomonidan 2026-yilning ikkinchi choragi yakunlari yuzasidan saylovchilar bilan ochiq muloqot o‘tkazildi hamda hisobot taqdim etildi.
Hisobot yig‘ilishida Bo‘zatov tumani hokimi o‘rinbosari, tegishli tashkilot va idoralar mas’ullari, mahalla faollari hamda saylovchilar ishtirok etdi.
Deputat o‘z hisobotida joriy yilning ikkinchi choragi davomida saylov okrugida amalga oshirilgan ishlar, fuqarolar murojaatlarini o‘rganish, ularning yechimi yuzasidan olib borilgan amaliy choralar hamda hududni ijtimoiy-iqtisodiy rivojlantirish borasidagi faoliyati haqida batafsil ma’lumot berdi.
Ta’kidlash joizki, deputat tashabbusi va amaliy sa’y-harakatlari natijasida Dobal qishlog‘iga 300 metr ichimlik suvi tarmog‘i tortilib, 52 ta xonadon toza ichimlik suvi bilan ta’minlandi. Mazkur ish aholi turmush sharoitini yaxshilash yo‘lida amalga oshirilgan muhim amaliy ishlardan biri sifatida e’tirof etildi.
Shuningdek, uchrashuv davomida saylovchilar tomonidan bildirilgan taklif va murojaatlar tinglanib, ularni qonunchilik doirasida hal etish yuzasidan tegishli mutasaddilarga aniq topshiriqlar berildi.
Bunday ochiq muloqotlar deputatlarning saylovchilar oldidagi hisobdorligini ta’minlash, fuqarolar bilan doimiy aloqani mustahkamlash hamda hududdagi mavjud muammolarni o‘z vaqtida bartaraf etishda muhim ahamiyat kasb etadi.