Tibbiyot birlashmasining markaziy diagnostika va mikrobsizlantirish bo‘limi faoliyati o‘rganildi.

Xalq deputatlari tuman Kengashi deputati A. Otayev, “Adolat” SDP tuman Kengashi raisi M. Eshmurodova hamda tuman Kengashi kotibiyati bosh mutaxassisi D. Qanoatov tomonidan tuman Tibbiyot birlashmasi tarkibidagi Markaziy diagnostika va mikrobsizlantirish bo‘limi faoliyati o‘rganildi.

O‘rganish davomida bo‘limning tibbiy asbob-uskunalarni zararsizlantirish jarayoni, sanitariya-gigiyena talablari hamda ish jarayonining tashkil etilishiga alohida e’tibor qaratildi.

Ma’lum qilinishicha, tibbiyot birlashmasining barcha bo‘limlaridan bir sutka davomida o‘rtacha 150 ta biks markaziy mikrobsizlantirish bo‘limiga olib kelinadi va belgilangan tartibda to‘liq zararsizlantiriladi. Bu esa tibbiyot muassasalarida infeksion xavfsizlikni ta’minlash hamda bemorlarga sifatli tibbiy xizmat ko‘rsatishda muhim ahamiyat kasb etadi.