Xalq deputatlari Boyovut tumani Kengashi deputati K.Karimova tomonidan joriy yilning 24-iyun kuni Boyovut tumani hokimi o‘rinbosari K.Abdaliyev nomiga A.Navoiy mahallasidagi ichimlik suvi minorasi bilan bog‘liq mavjud muammolar yuzasidan deputat so‘rovi yuborilgan edi.

Deputat so‘rovida ichimlik suvi minorasi atrofining o‘ralmagani, elektr simlarining ochiq holda ekani hamda suv dozatorlarini joylashtirish uchun maxsus inshoot (domik) qurilmagani qayd etilib, mazkur kamchiliklarni bartaraf etish bo‘yicha amaliy choralar ko‘rish so‘ralgan.

Bugun mazkur deputat so‘rovi ijrosini ta’minlash maqsadida Boyovut tumani "Suvta’minot" unitar korxonasi rahbari hamda mas’ul xodimlari hududga chiqib, mavjud holatni joyida atroflicha o‘rgandilar.

O‘rganishlar yakunida deputat so‘rovida ko‘tarilgan masalalarni bartaraf etish bo‘yicha joriy haftaning dushanba kunidan boshlab amaliy ishlar boshlanishi ma’lum qilindi.

Xalq deputatlari Boyovut tumani Kengashi deputati K.Karimova tomonidan mazkur ishlarning bajarilishi va deputat so‘rovi ijrosi nazoratga olingan bo‘lib, belgilangan vazifalarning o‘z vaqtida va sifatli amalga oshirilishi yuzasidan monitoring ishlari davom ettiriladi.