Davlatimiz rahbarining 2025-yil 25-dekabrdagi PQ–386-sonli “Surxondaryo viloyatining salohiyati va imkoniyatlaridan to‘liq foydalanish bo‘yicha qo‘shimcha chora-tadbirlar to‘g‘risida”gi qarori ijrosi doirasida Muzrabot tumanida keng ko‘lamli bunyodkorlik va infratuzilmani rivojlantirish ishlari izchil amalga oshirilmoqda.

Jumladan, mazkur qaror asosida tuman markazidan o‘tuvchi V026 avtomobil yo‘lining 6 kilometr qismida kapital ta’mirlash ishlari olib borilmoqda. Ayni paytda yo‘lning eski asfalt qoplamasi olib tashlanib, yangi asfalt-beton qoplamasini yotqizish uchun zarur tayyorgarlik ishlari yakuniy bosqichga yetkazilgan.

Loyiha 2026–2027-yillarga mo‘ljallangan ikki yillik dastur asosida amalga oshirilayotgan bo‘lib, uning umumiy qiymati 9 milliard so‘mni tashkil etadi. Qurilish-ta’mirlash ishlari Muzrabot tuman yo‘llardan foydalanish davlat muassasasi tomonidan tasdiqlangan reja asosida olib borilmoqda.

Mazkur loyiha doirasida bajarilayotgan ishlar jarayoni xalq deputatlari Muzrabot tumani Kengashi kotibiyati mudiri Sherboyev Dilmurod va tuman Kengashi kotibiyati bosh mutaxassisi B.Xoliqovlar tomonidan o‘rganildi. O‘rganishlar davomida qurilish ishlarining sifati, loyiha hujjatlariga muvofiqligi, ajratilgan mablag‘larning maqsadli sarflanishi hamda ishlarning belgilangan muddatlarda bajarilishi masalalariga alohida e’tibor qaratildi.

O‘rganish yakunlari bo‘yicha deputatlar tomonidan mas’ul tashkilot vakillariga qurilish-ta’mirlash ishlarini sifatli hamda belgilangan muddatlarda yakunlash yuzasidan tegishli tavsiya va takliflar bildirildi.