Халқ депутатлари Янгиқўрғон тумани Кенгаши депутати Миразимов Рустамжон Ғуломович ҳамда Деҳқонобод маҳалласи нуронийлари иштирокида Янгиқўрғон туманидаги 2-сонли умумий ўрта таълим мактабига ташриф амалга оширилди.

Ташриф давомида мактаб кутубхонаси фаолияти билан яқиндан танишилди. Жумладан, кутубхонада яратилган шароитлар, китоб фондининг ҳолати, мавжуд адабиётлар тури ва улардан ўқувчиларнинг фойдаланиш даражаси ўрганилди.

Шунингдек, кутубхоначи томонидан янги келиб тушган адабиётларни ўқувчиларга таништириш, уларнинг китобга бўлган қизиқишини ошириш, ўқувчилар ўртасида турли маънавий-маърифий тадбирлар ташкил этиш ҳамда китобхонлик маданиятини кенг тарғиб қилиш борасида амалга оширилаётган ишлар муҳокама қилинди.

Ташриф чоғида ёш авлоднинг билимли, маънавиятли ва китобсевар бўлиб вояга етишида мактаб кутубхоналарининг ўрни беқиёс экани алоҳида таъкидланди. Шу билан бирга, келгусида кутубхона фаолиятини янада самарали ташкил этиш, китоб мутолаасига бўлган қизиқишни кучайтириш ва бу борада нуронийлар ҳамда жамоатчилик билан ҳамкорликни мустаҳкамлаш юзасидан фикр-мулоҳазалар билдирилди.