Prezidentimiz 2024-yil 20-noyabr kuni Oliy Majlis Qonunchilik palatasida so‘zlagan nutqida aholi o‘rtasida sog‘lom turmush tarzini shakllantirish, to‘g‘ri ovqatlanish, jismoniy
tarbiya va sportni ommalashtirish masalasiga alohida to‘xtalib, ustuvor vazifalarni belgilab bergan edi. 

Sog‘lom turmush tarzini shakllantirish, uning keng targ‘ibotini ta’minlash masalasi ijtimoiy ahamiyatga ega bo‘lib, u umumjamiyat harakatiga aylansagina natijaga
erishiladi. Shundan kelib chiqib, kyeyingi yillarda aholi salomatligini saqlash, xalqimiz o‘rtasida sportni ommalashtirish, sog‘lom turmush tarzini ommalashtirish
borasida parlament palatalari tomonidan ham ta’sirchan chora-tadbirlar amalga oshirib kelinmoqda.  

Xususan, ushbu masalaga fraksiyalar, qo‘mitalar, komissiyalarning yig‘ilishlarida, saylovchilar bilan uchrashuvlarda alohida e’tibor qaratilib, samarali parlament
nazorati olib borilmoqda. Sohaga oid qonunchilik hujjatlari hayotiy ehtiyojlardan kelib chiqib takomillashtirilmoqda.  

Davlatimiz rahbarining bu borada ilgari surgan tashabbuslari asosida Oliy Majlis Senati va Qonunchilik palatasi tomonidan “Aholi o‘rtasida sog‘lom turmush tarzini ommalashtirish bo‘yicha xalq deputatlari viloyat Kengashi uchun tavsiyalar” ishlab chiqilgan. 

Tavsiyalarni ishlab chiqishda aholi salomatligini muhofaza qilish, jismoniy tarbiya va sportni ommalashtirish borasida Prezidentimiz boshchiligida mamlakatimizda amalga
oshirilayotgan islohotlariga, Jahon sog‘liqni saqlash tashkilotining sohaga oid tahlillariga alohida e’tibor qaratildi. 

Ushbu tavsiyalarda aholi o‘rtasida sog‘lom turmush tarzini ommalashtirish, hududlarda jismoniy tarbiya va sportni rivojlantirish bo‘yicha amalga oshirilayotgan ishlarning
holati yuzasidan mutasaddi idoralar rahbarlarining axborotini mahalliy Kengashlar sessiyalarida muntazam ravishda eshitib borish, sohada olib borilayotgan ishlar ustidan deputatlik nazoratini kuchaytirish, targ‘ibot tadbirlariga keng jamoatchilikni jalb etish kabi vazifalar nazarda tutilgan. 

2025-yil 10-aprel kuni xalq deputatlari Sirdaryo viloyati Kengashining navbatdagi yig‘ilishida ayni masala atroflicha muhokama qilindi. Yig‘ilishda hududga biriktirilgan Oliy Majlis Qonunchilik palatasi deputatlari, Palataning Mehnat, sog‘liqni saqlash va ijtimoiy masalalar qo‘mitasi raisi Muxtorova Nazira Abdusattarovna hamda qo‘mitasi a’zosi Astanoqulova Ra’no Xursanovna ishtirok etdi. 

Ta’kidlanganidek, keyingi yillarda yurtimizda jismoniy tarbiya va sportni rivojlantirish, aholi o‘rtasida sog‘lom turmush tarzini shakllantirish uchun zarur shart-sharoit va imkoniyatlar yaratilib, mazkur soha tubdan isloh qilinmoqda. 

Sohaning huquqiy asoslari takomillashtirilib, o‘tgan davrda qator qonunlar, mamlakatimiz Prezidentining sohaga oid 80 dan ortiq farmon va qarorlari qabul qilindi. Davlat byudjetidan Sport sohasiga ajratilayotgan mablag‘lar 15 karra oshirildi. Ushbu mablag‘lar 2017-yilda 7.4 mlrd so‘mni tashkil etgan bo‘lsa, 2024-yilda 95.3 mlrd so‘mga yetdi, 2025-yilda esa 111.8 mlrd so‘m ajratildi. Sport obyektlarini rekonstrusiya ishlari uchun mablag‘ 9,5 mlrd. so‘mdan 30,9 mlrd. so‘mga oshdi, 2024-yilda 1 tasi yangi qurilgan bo‘lsa, 1 tasi rekonstruksiyadan chiqarildi. Joriy 2025-yilda Guliston shahrida “Boks saroyi” binosini yangidan qurish va 3 ta mavjud obyektlarni rekonstruksiya va mukammal ta’mirdan chiqarish rejalashtirilgan.  

Sohada olib borilgan islohotlar natijasida mamlakatimiz aholisining o‘rtacha umr ko‘rish davomiyligi 2010-yildagi 72,9 yoshdan 2024-yilda 74,7 yoshga yetdi. 

Yig‘ilishda parlament palatalari tomonidan ishlab chiqilgan tavsiyalar asosida joylarda aholi orasida keng targ‘ibot-tushuntirish ishlari olib borilayotganligi hamda ushbu masala mahalliy Kengashlar sessiyalarida atroflicha muhokama qilib borilayotganligi qayd etildi. 

Shuningdek, viloyatda aholi o‘rtasida sog‘lom turmush tarzini shakllantirish, to‘g‘ri ovqatlanish, jismoniy tarbiya va sportni ommalashtirish borasida amalga
oshirilayotgan ishlar qizg‘in muhokama qilinib, mutasaddi tashkilot rahbarlarining axborotlari eshitildi. Muhokamalar yakunida viloyatda sohada uchrayotgan muammolarni hal etish, mazkur yo‘nalishdagi ishlarning samaradorligini oshirish, aholi orasida amalga oshiriladigan targ‘ibot-tushuntirish ishlariga keng jamoatchilikni, mahalla
yettiligini, nodavlat, notijorat tashkilotlarni, OAV vakillarini jalb etish bo‘yicha taklif va tavsiyalar bildirildi. Sessiyada viloyatda aholining salomatligini saqlash, sog‘lom turmush tarzini shakllantirish borasida mutasaddi tashkilotlar oldida turgan ustuvor vazifalar, shuningdek ushbu vazifalarni o‘z vaqtida va sifatli amalga oshirilishi ustidan samarali deputatlik nazoratini amalga oshirishga kelishib olindi.