Xalq deputatlari Parkent tumani Kengashi huzuridagi Yoshlar maslahat guruhi a’zosi, Oliy Majlis Qonunchilik palatasi huzuridagi Yoshlar parlamenti a’zosi Qiyomova Marjona Murodxo‘ja qizi Davlat rahbari bilan Janubiy Koreya, Seul shahrida
 bo‘lib o‘tgan uchrashuvda ishtirok etib, yoshlar uchun muhim bo‘lgan tashabbus va takliflarini bildirdi.
🎓 Qiyomova Marjona Murodxo‘ja qizi o‘zining ilmiy va ta’lim sohasidagi yutuqlari bilan tengdoshlariga munosib namuna bo‘lib kelmoqda. U 2025-yilda Janubiy Koreya Xalqaro sog‘liqni saqlash fondining 100 foizlik grant stipendiyasi sohibasi bo‘lgan.
Hozirda Marjona Qiyomova xalqaro reytingda 42-o‘rinda turuvchi Yonsei universitetida biotibbiyot muhandisligi yo‘nalishi bo‘yicha magistratura bosqichida tahsil olmoqda.
🧬 Biotibbiyot muhandisligi — tibbiyot, biologiya va zamonaviy muhandislik texnologiyalarini uyg‘unlashtiruvchi istiqbolli yo‘nalishlardan biri bo‘lib, ushbu sohada yetuk mutaxassislarni tayyorlash mamlakatimiz tibbiyot va innovatsion texnologiyalar salohiyatini yanada oshirishga xizmat qiladi.
💡 Suhbat davomida Marjona Qiyomova tomonidan Toshkent shahrining Olmazor tumanida Yangi O‘zbekistonda ilk marotaba to‘liq moliyalashtiriladigan Milliy biotibbiyot muhandislari dasturini yo‘lga qo‘yish tashabbusi ilgari surildi.
📚 Mazkur tashabbus orqali yoshlarning zamonaviy bilim va ko‘nikmalarni egallashi, xalqaro tajribani o‘rganishi hamda biotibbiyot muhandisligi kabi istiqbolli sohalarda malakali mutaxassislar safini kengaytirish uchun yangi imkoniyatlar yaratilishi ko‘zda tutiladi.
🌱 Ayniqsa, xorijda tahsil olayotgan va xalqaro tajriba orttirayotgan yoshlarning bilim va salohiyatini O‘zbekiston taraqqiyotiga yo‘naltirish, ularning ilg‘or g‘oyalarini qo‘llab-quvvatlash bugungi kunning muhim vazifalaridan biridir.
🏞 Suhbat davomida Toshkent viloyatining Parkent tumani haqida ham fikr yuritilib, tumanning investitsion jozibadorligini oshirish, mavjud imkoniyatlardan samarali foydalanish hamda turizm salohiyatini yanada rivojlantirish borasida amalga oshirilayotgan ishlar haqida alohida ta’kidlandi.
📈 Parkent tumanining tabiiy, geografik va turistik imkoniyatlari, tadbirkorlik va investitsiya uchun mavjud sharoitlari hududning kelgusidagi rivojlanishi uchun muhim omillardan biri sifatida qayd etildi.
✨ Yoshlarning davlat boshqaruvida faol ishtirok etishi, o‘z tashabbus va takliflarini yuqori darajada ilgari surishi — Yangi O‘zbekiston yoshlarining bilimli, tashabbuskor va kelajakka intiluvchan avlod sifatida shakllanayotganining muhim ko‘rinishidir.
Qiyomova Marjona Murodxo‘ja qizining xalqaro ta’lim va ilmiy tajribasi, yoshlar bilan ishlashdagi faolligi hamda yangi tashabbuslari Parkent yoshlarining salohiyati va imkoniyatlarini namoyon etuvchi yorqin misollardan biridir.
🌟 Bilimli yosh — yurt kelajagi! Tashabbuskor yosh — taraqqiyot tayanchi!