Xalq deputatlari Furqat tumani Kengashiga 18-O‘rtaqo‘rg‘on saylov okrugidan saylangan deputat Mahkamov Ixtiyor o‘ziga biriktirilgan tashkilotlar bilan yaqindan tanishish va ular faoliyatini o‘rganish doirasida Furqat tumani Yoshlar ishlari agentligida bo‘ldi.

Tashrif davomida agentlik rahbari U. Razzaqov bilan uchrashuv va muloqot o‘tkazilib, bugungi kunda yoshlar bilan ishlash tizimida amalga oshirilayotgan ishlar, sohadagi mavjud vazifalar hamda kelgusidagi ustuvor yo‘nalishlar xususida fikr almashildi.

Suhbat jarayonida, avvalo, yoshlarning huquq va qonuniy manfaatlarini ta’minlash, ularning bo‘sh vaqtlarini mazmunli tashkil etish, bandligini ta’minlash, kasb-hunarga yo‘naltirish, tadbirkorlik tashabbuslarini qo‘llab-quvvatlash, iqtidorli yoshlarni aniqlash va ularning salohiyatini ro‘yobga chiqarish masalalariga alohida e’tibor qaratildi.

Shuningdek, yoshlarning muammolarini o‘z vaqtida aniqlash, ular bilan manzilli ishlash, murojaatlarini o‘rganish va hal etish, uyushmagan yoshlarni jamiyat hayotiga faol jalb qilish hamda ularning ijtimoiy faolligini oshirish borasida deputatlik korpusi va Yoshlar ishlari agentligi o‘rtasidagi amaliy hamkorlikni yanada kuchaytirish muhimligi ta’kidlandi.

Uchrashuv yakunida tomonlar yoshlarga oid davlat siyosati doirasida belgilangan vazifalarni samarali amalga oshirish, hududdagi yoshlarning muammolarini hamkorlikda o‘rganish va ularga amaliy yechim topish, shuningdek, kelgusida mazkur yo‘nalishdagi ishlarni tizimli tashkil etish bo‘yicha o‘zaro kelishib oldilar.