Xalq deputatlari Bo‘stonliq tumani Kengashining 2026-yilga mo‘ljallangan Ish rejasiga muvofiq O‘zbekiston “Adolat” sotsial-demokratik partiyasidan saylangan deputat T.Mirsidiqov tumanning “Xumson” mahallasida mahalla xodimlari tomonidan aholining murojaatlari bilan ishlash holati bo‘yicha o‘rganish o‘tkazilib, huquqbuzarliklarning oldini olish borasida amalga oshirilayotgan ishlar tahlil qilindi.

🔺O‘rganish jarayonida mahalla fuqarolar yig‘ini raisi tomonidan aholidan kelib tushayotgan murojaatlarni qabul qilish, ularni o‘z vaqtida ko‘rib chiqish va muammolarni hal etish bo‘yicha amalga oshirilayotgan ishlar tahlil qilindi. Xususan, murojaatlarni ro‘yxatga olish, ijrosini ta’minlash, takroriy murojaatlarning oldini olish hamda aholini qiynayotgan ijtimoiy-iqtisodiy muammolarni bartaraf etish yuzasidan ko‘rilayotgan chora-tadbirlarga alohida e’tibor qaratildi.

🔺Mahallada jinoyatchilik va huquqbuzarliklarning oldini olish bo‘yicha olib borilayotgan profilaktik ishlar ham atroflicha tahlil qilindi. Shuningdek, huquqbuzarlikka moyil shaxslar, nazoratda turuvchi fuqarolar, muammoli oilalar hamda ijtimoiy himoyaga muhtoj aholi qatlamlari bilan olib borilayotgan manzilli ishlar haqida ma’lumot berildi.

🔺O‘rganish davomida yoshlar o‘rtasida huquqbuzarliklarning oldini olish, oilalarda sog‘lom ma’naviy muhitni shakllantirish, aholining huquqiy madaniyatini oshirish hamda “Xavfsiz mahalla” tamoyili asosida olib borilayotgan ishlarga e’tibor qaratildi.