Xalq deputatlari Ishtixon tumani Kengashi deputati U.Nurmuxamedov tomonidan Ishtixon tumani Davlat xizmatlari markaziga olib boruvchi yo‘lning holati yuzasidan tegishli tashkilotga deputat so‘rovi yuborildi.

Hududda aholi va saylovchilar bilan o‘tkazilgan uchrashuvlar davomida fuqarolar tomonidan mazkur yo‘lning ayrim qismlarida suv to‘planib qolayotgani sababli harakatlanishda qiyinchiliklar yuzaga kelayotgani bildirildi. Ushbu yo‘l davlat xizmatlaridan foydalanish uchun kelayotgan fuqarolar, shuningdek atrofdagi ko‘p qavatli uylar aholisi tomonidan muntazam foydalaniladigan serqatnov yo‘llardan biri hisoblanadi.

Ayniqsa yomg‘irli kunlarda yo‘lning ayrim joylari suv bilan to‘lib qolishi natijasida piyodalar uchun yurish qiyinlashib, transport vositalarining harakatlanishida ham noqulayliklar yuzaga kelmoqda. Bu esa hudud aholisi va davlat xizmatlaridan foydalanish uchun kelayotgan fuqarolar tomonidan haqli e’tirozlarga sabab bo‘lmoqda.

Shu munosabat bilan deputat tomonidan mazkur hududdagi yo‘lning texnik holatini joyiga chiqib o‘rganish, suv to‘planishiga sabab bo‘layotgan omillarni aniqlash hamda muammoni bartaraf etish bo‘yicha amaliy choralar ko‘rish yuzasidan tegishli tashkilotga deputat so‘rovi kiritildi.

📌 Qonunchilikka muvofiq, deputat so‘roviga 10 kun muddatda rasmiy javob taqdim etilishi lozim.

✅ Aholi uchun qulay va xavfsiz infratuzilma yaratish, ichki yo‘llarning holatini yaxshilash masalalari deputat nazoratida qoladi.