Tuman Kengashining Korrupsiyaga qarshi kurashish komissiyasi tomonidan banklarda o‘rganish ishlari olib borildi

Xalq deputatlari Termiz tuman Kengashining Korrupsiyaga qarshi kurashish komissiyasi tomonidan korrupsiyaga qarshi kurashish borasida davlat siyosati ijrosini ta’minlash, bank-moliya sohasida shaffoflik va ochiqlikni kuchaytirish maqsadida tumanda faoliyat yuritib kelayotgan bank muassasalarida o‘rganish va tahlil ishlari olib borildi.

Mazkur o‘rganishlar jarayonida banklar faoliyatida korrupsion holatlarning oldini olishga qaratilgan mexanizmlar, kredit ajratish tartiblari, bank xizmatlaridan foydalanishda fuqarolar va tadbirkorlarga yaratilgan sharoitlar, hujjatlarni rasmiylashtirish jarayonlari hamda murojaatlar bilan ishlash holatlari atroflicha o‘rganildi.

Shuningdek, bank xodimlari tomonidan xizmat vazifalarini bajarishda qonuniylikka rioya etilishi, manfaatlar to‘qnashuvining oldini olish bo‘yicha ko‘rilayotgan choralar, ichki nazorat tizimlarining samaradorligi hamda korrupsiyaga qarshi ichki dasturlar ijrosi holatiga alohida e’tibor qaratildi. Fuqarolar bilan bevosita muloqot o‘tkazilib, ularning bank xizmatlari bo‘yicha taklif va e’tirozlari tinglandi.

O‘rganishlar natijasida ayrim kamchilik va muammolar aniqlanib, ularni bartaraf etish, bank xizmatlarida shaffoflikni oshirish, korrupsion xavf-xatarlarni kamaytirish bo‘yicha tegishli tavsiyalar ishlab chiqildi. Bank rahbarlari va mas’ul xodimlariga qonunchilik talablariga qat’iy rioya etish, fuqarolar bilan muomala madaniyatini yanada oshirish yuzasidan aniq vazifalar belgilab berildi.

Tuman Kengashining Korrupsiyaga qarshi kurashish komissiyasi tomonidan bu kabi o‘rganishlar kelgusida ham tizimli ravishda davom ettirilishi, bank-moliya sohasida korrupsiyaga nisbatan murosasiz munosabatni shakllantirish hamda aholining bank tizimiga bo‘lgan ishonchini mustahkamlashga xizmat qilishi qayd etildi.