Loyiha doirasida deputat o‘z saylov okrugiga kiruvchi “Madaniyat”, “Sohil” va “Beruniy” mahallalarida bo‘lib, joylardagi dolzarb muammolar bilan yaqindan tanishdi. Xususan, “Beruniy” mahallasida ta’mir talab, qarovsiz va foydalanishga yaroqsiz holga kelib qolgan ixtisoslashtirilgan maktab binosi ko‘zdan kechirildi. Mazkur ta’lim muassasasining holatini yaxshilash, uni qayta ta’mirlash hamda kelgusida samarali foydalanish bo‘yicha masalalar muhokama qilindi.

Shuningdek, deputat saylovchilar bilan ochiq muloqot o‘tkazib, ularning muammo va takliflarini tingladi. Muloqot davomida asosiy muammolardan biri sifatida “Madaniyat” mahallasidagi “Tashabbuskor” ko‘chasini shag‘allantirish hamda ushbu ko‘chani asfaltlash uchun 2026-yil Davlat dasturiga kiritish zarurligi aniqlandi. Mazkur masalaning yechimi bo‘yicha amaliy ishlar olib borilishi deputat tomonidan ta’kidlandi.

Bundan tashqari, deputat “Sohil” mahallasida yangi ochilayotgan o‘quv markazi faoliyati bilan yaqindan tanishib, binoda o‘quvchilar uchun yaratilgan qulay sharoitlarni ko‘zdan kechirdi va markaz faoliyatiga ijobiy baho berdi.

Xalq deputatlari Boyovut tumani Kengashi kotibiyati