Xalq deputatlari Quva tuman Kengashi deputatlari ta’lim muassasalarida kuz-qish mavsumiga
tayyorgarlik holatini o‘rgandilar 

  Xalq deputatlari Quva tuman Kengashi
deputatlaridan iborat ishchi guruh tomonidan O‘zbekiston Respublikasi Prezidentining
2023 yil 10 apreldagi “Ijtimoiy soha ob’ektlarining isitish tizimlarini davlat-xususiy
sherikchilik asosida modernizatsiya qilish to‘g‘risida”gi PQ–118-son qarori ijrosini
ta’minlash maqsadida tumandagi bir qator ta’lim va tarbiya muassasalarida kuz-qish
mavsumiga tayyorgarlik ishlari holati o‘rganildi. 

Jumladan, ishchi guruh tumandagi
21-, 30-, 32-, 65-umumiy o‘rta ta’lim maktablari hamda 6-son maktabgacha ta’lim
tashkilotida amalga oshirilayotgan tayyorgarlik ishlarini ko‘zdan kechirdi. 

Tashrif davomida deputatlar ta’lim
muassasalaridagi isitish tizimlari va tarmoqlarining holati, yoqilg‘i zaxiralari,
muhandislik kommunikatsiyalari hamda binolarning mavsumiy talablarga mosligi bo‘yicha
o‘rganishlar olib bordilar. 

Ta’kidlash lozimki, mazkur muassasalar
bino va inshootlarini isitish mas’uliyati tumandagi “Sharq javohiri” davlat-xususiy
sheriklik korxonasi zimmasiga yuklatilgan. Hozirgi kunda korxona ishchilari tomonidan
reja-grafik asosida biriktirilgan muassasalarda tizimdagi mavjud nosozliklarni bartaraf
etish va ta’mirlash ishlari amalga oshirilmoqda. 

O‘rganishlar jarayonida deputatlar
tomonidan “Sharq javohiri” davlat-xususiy sheriklik korxonasi rahbariyatiga korxonaga
biriktirilgan muassasalarda issiqlik tizimi tarmoqlarini profilaktik ta’mirlash
va sinov ishlarini isitish mavsumi boshlangunga qadar sifatli yakunlash zarurligi
ta’kidlandi hamda tegishli tavsiyalar berildi. 

Shu bilan birga, deputatlar ta’lim
muassasalarida yoshlarning sog‘lom va qulay sharoitlarda ta’lim-tarbiya olishini
ta’minlash muhim vazifa ekanligini alohida qayd etdilar.