Xalq deputatlari Qo‘qon shahar Kengashi Kotibiyati mudiri A.Nosirov tomonidan deputat Sh.Usmonov saylangan saylov hududida joylashgan “Shirin” mahalla fuqarolar yig‘inida “Mahalla yettiligi” a’zolari bilan birgalikda O‘zbekiston Respublikasi Prezidentining PF-193-sonli Farmoni ijrosi yuzasidan amalga oshirilayotgan ishlar muhokama qilindi.

Muhokama davomida mahallada ishsiz fuqarolarni aniqlash, ularning bandligini ta’minlash hamda doimiy daromad manbalariga ega bo‘lishiga ko‘maklashish borasida olib borilayotgan ishlar ko‘rib chiqildi.

Ma’lum qilinishicha, mahallada 42 nafar ishsiz fuqaroning 28 nafari ishga joylashtirilgan. Qolgan 14 nafar fuqaroning bandligini ta’minlash bo‘yicha ham tegishli ishlar olib borilmoqda. Ularni mavjud bo‘sh ish o‘rinlariga yo‘naltirish va bandligini ta’minlash masalalariga alohida e’tibor qaratilmoqda.

Shuningdek, ayni paytda mahalladagi 4 871 ta axoli kesimida xatlov ishlari olib borilayotgani qayd etildi. Xatlov jarayonida xonadonlarning ijtimoiy-iqtisodiy holati, oila a’zolarining bandligi, daromad manbalari hamda mavjud ehtiyojlari o‘rganilmoqda.

Har bir xonadon bo‘yicha ma’lumotlarni shakllantirish, aniqlangan muammolarni tegishli yo‘nalishlar asosida tizimli hal etish va fuqarolarni mavjud imkoniyatlardan foydalanishga yo‘naltirish masalalariga e’tibor qaratilmoqda.

Muhokama yakunida “Mahalla yettiligi” a’zolarining o‘zaro hamkorligini kuchaytirish, ishsiz fuqarolarni ishga joylashtirish bo‘yicha ishlarni davom ettirish hamda xatlov natijalaridan kelib chiqib, aholining muammolarini manzilli hal etish yuzasidan tegishli vazifalar belgilandi.

Xalq deputatlari Qo‘qon shahar Kengashi