Bolalarni zo‘ravonlikning barcha shakllaridan himoya qilish tizimini takomillashtirishga qaratilgan qonun loyihasi Oliy Majlis Qonunchilik palatasida ikkinchi o‘qishda qabul qilindi.

Ushbu qonun loyihasi bilan kiritilayotgan eng muhim o‘zgarishlar va yangiliklar:
14 yoshga to‘lmagan bolalarga nisbatan sodir etilgan o‘ta og‘ir jinsiy jinoyatlar (nomusga tegish yoki jinsiy ehtiyojni g‘ayritabiiy usulda qondirish) uchun uzoq muddatli yoki umrbod ozodlikdan mahrum qilish jazosi belgilanmoqda.
Jahon axborot tarmog‘idan (Internetdan) foydalangan holda bolalarga nisbatan uyatsiz-buzuq harakatlar sodir etganlik uchun Jinoyat va Ma’muriy javobgarlik to‘g‘risidagi kodekslarda yangi javobgarlik choralari joriy etilmoqda.
Voyaga yetmaganlarga nisbatan sodir etilgan shahvoniy shilqimlik holatlarini (MJtKning 41¹-moddasi) ko‘rib chiqishning alohida tartibi o‘rnatilmoqda. Jinoyat alomatlari mavjud bo‘lgan holatlarning ma’muriy huquqbuzarlik sifatida yashirib qolinishi oldini olish maqsadida materiallar 1 kun ichida jinoyat ishlari bo‘yicha sudlarga yuboriladi.
Jinsiy erkinlik va oilaga qarshi jinoyat sodir etgan shaxslarning maxsus reyestri ma’lumotlaridan foydalanish hamda voyaga yetmaganlar bilan ishlaydigan tashkilotlarda nazorat mexanizmlari kuchaytirilmoqda.