Xalq deputatlari Chilonzor tuman Kengashi deputati Mutalov Omonulla Nig‘matullayevich o‘z saylov okrugidagi Ko‘rkam mahallasiga tashrif buyurib, mahallada hokim yordamchisi tomonidan amalga oshirilayotgan ishlar samaradorligi bilan yaqindan tanishdi.

Tashrif davomida, avvalo, mahalladagi ijtimoiy-iqtisodiy holat, aholi bandligini ta’minlash, fuqarolarning daromadlarini oshirish hamda ehtiyojmand oilalarni kambag‘allikdan chiqarish borasida olib borilayotgan ishlar atroflicha o‘rganildi.

Shuningdek, aholining mavjud muammolarini aniqlash, ularni tegishli tashkilotlar bilan hamkorlikda hal etish, ishsiz fuqarolarni kasb-hunarga o‘qitish va doimiy daromad manbalarini yaratishga ko‘maklashish masalalariga alohida e’tibor qaratildi.

O‘rganish jarayonida hokim yordamchisi faoliyatining natijadorligi, amalga oshirilayotgan chora-tadbirlarning manzilliligi va ularning aholi turmush sharoitini yaxshilashga ta’siri yuzasidan fikr almashildi.

Deputat tomonidan mahallada kambag‘allikni qisqartirish, aholi bandligini ta’minlash va fuqarolarning farovonligini oshirishga qaratilgan ishlarni yanada samarali tashkil etish bo‘yicha tegishli tavsiya va takliflar bildirildi.