Uchqun mahallasida hududdagi mavjud muammolar joyiga chiqqan holda o‘rganildi

O‘zbekiston Respublikasining "Mahalliy davlat hokimiyati to‘g‘risida"gi Qonuni hamda "Fuqarolarning murojaatlari to‘g‘risida"gi Qonuni talablaridan kelib chiqib, hududlarda mavjud muammolarni manzilli o‘rganish, aholi murojaatlariga o‘z vaqtida yechim topish va infratuzilma obyektlarining holatini yaxshilash yuzasidan tizimli ishlar amalga oshirilmoqda.

Shu munosabat bilan Xalq deputatlari Namangan shahar Kengashi kotibiyati mudiri N.Ubaydullayev tomonidan Uchqun mahallasi hududida joyiga chiqqan holda o‘rganish ishlari olib borildi.

O‘rganish davomida mahalla hududidagi ichki ko‘chalarning holati, elektr ta’minoti infratuzilmasi, yo‘l bo‘yi ariqlari, piyodalar harakati xavfsizligi hamda hududni obodonlashtirish bilan bog‘liq masalalar atroflicha ko‘zdan kechirildi. Shuningdek, fuqarolar bilan bevosita muloqot qilinib, ularni qiynayotgan muammolar, taklif va mulohazalar tinglandi.

Hududni ko‘zdan kechirish jarayonida aniqlangan kamchiliklar yuzasidan mas’ul tashkilotlar bilan birgalikda amalga oshirilishi lozim bo‘lgan chora-tadbirlar belgilab olinib, mavjud muammolarni bosqichma-bosqich bartaraf etish yuzasidan tegishli tavsiyalar berildi.

Joylarda olib borilayotgan bunday o‘rganishlar fuqarolar murojaatlariga tezkor munosabat bildirish, hudud infratuzilmasini yanada yaxshilash hamda aholi uchun qulay va xavfsiz sharoit yaratishga xizmat qiladi. Mazkur yo‘nalishdagi ishlar deputatlik nazorati asosida izchil davom ettiriladi.