Aholi daromadlarini oshirish, bandligini ta’minlash, tadbirkorlik faoliyatini yo‘lga qo‘yish va ehtiyojmand oilalarni kambag‘allikdan chiqarish bo‘yicha belgilangan vazifalarning manzilli va samarali ijrosini ta’minlash muhim yo‘nalishlardan biridir.

Xalq deputatlari Yangiobod tuman Kengashi deputati A. Isroilov tomonidan Sarmich mahallasida mahalla yettiligi va mahalla faollari ishtirokida aholini kambag‘allikdan chiqarish bo‘yicha belgilangan topshiriqlar ijrosiga bag‘ishlangan yig‘ilish o‘tkazildi.

Yig‘ilishda mahalladagi ehtiyojmand va kambag‘al oilalarni aniqlash, ularning muammolarini xonadonbay o‘rganish, har bir oila uchun individual yondashuv asosida aniq chora-tadbirlarni belgilash masalalari muhokama qilindi.

Shuningdek, fuqarolarni doimiy va daromadli ish bilan ta’minlash, kasb-hunarga o‘qitish, tadbirkorlikka jalb etish, imtiyozli kredit va subsidiyalardan samarali foydalanish, tomorqa va boshqa mavjud imkoniyatlardan unumli foydalanish orqali oilalar daromadini oshirishga alohida e’tibor qaratildi.

Mahalla yettiligi va mahalla faollari bilan suhbat davomida avval belgilangan topshiriqlarning ijrosi, amalga oshirilgan ishlar hamda yechimini kutayotgan masalalar tahlil qilindi. Har bir yo‘nalish bo‘yicha mavjud muammolarni bartaraf etish va natijadorlikni oshirish yuzasidan fikr almashildi.

Yig‘ilish yakunida aniqlangan masalalar va mavjud imkoniyatlardan kelib chiqib, aholini kambag‘allikdan chiqarish bo‘yicha aniq vazifalar belgilandi. Mas’ullarga topshiriqlar ijrosini manzilli tashkil etish, har bir xonadon bilan individual ishlash hamda erishilgan natijalarni muntazam tahlil qilib borish yuzasidan tegishli tavsiyalar berildi.