Aholining munosib va qulay sharoitda yashashi, hududlarda sanitariya-obodonlashtirish talablariga rioya etilishini ta’minlash hamda fuqarolar murojaatlarida ko‘tarilgan masalalarni joyida o‘rganish — deputatlik nazoratining muhim yo‘nalishlaridan biridir.

Termiz shahar 1-“Temiryo‘lchi” saylov okrugida o‘tkazilgan deputatlik nazorati doirasidagi o‘rganish davomida “Temiryo‘lchi” mahallasi “Sherobod” ko‘chasi hududidagi sanitariya va obodonlashtirish holati ko‘zdan kechirildi.
O‘rganish davomida mazkur hududda maishiy va qurilish chiqindilari to‘planib qolganligi, chiqindilarni yig‘ish uchun mo‘ljallangan konteynerlar mavjud emasligi aniqlandi.
Shuningdek, hududga yaqin joylashgan “Temiryo‘lchi mahalla servis kompaniyasi” MChJ atrofi obodonlashtirish ishlarini talab darajasida tashkil etilmaganligi, turli xil yovvoyi o‘tlar o‘sib ketganligi kuzatildi.

Aniqlangan holatlar hududning sanitariya-obodonlashtirish talablariga javob bermasligi, atrof-muhitga salbiy ta’sir ko‘rsatishi hamda fuqarolarning e’tirozlariga sabab bo‘lishi mumkin.

Mazkur masalalarni bartaraf etish maqsadida xalq deputatlari Termiz shahar Kengashining 1-“Temiryo‘lchi” saylov okrugi deputati Fayzullayev Xikmat Boboqulovich tomonidan Termiz shahar hokimining o‘rinbosari B.Ergashovga deputat so‘rovi yuborildi.

Deputat so‘rovida:

“Sherobod” ko‘chasi hududida to‘planib qolgan maishiy va qurilish chiqindilarini zudlik bilan olib chiqish;

hududga zarur miqdorda chiqindi konteynerlarini o‘rnatish va ularning sanitariya holatini muntazam nazorat qilish;

“Temiryo‘lchi mahalla servis kompaniyasi” MChJ atrofini obodonlashtirish, yovvoyi o‘tlarni o‘rish va hududni sanitariya jihatdan tartibga keltirish;

kelgusida chiqindilarning to‘planib qolishiga yo‘l qo‘ymaslik va ularni o‘z vaqtida olib chiqishni ta’minlash;

amalga oshirilgan ishlar hamda ko‘rilgan choralar yuzasidan yozma ma’lumot taqdim etish so‘raldi.

Deputatlik nazorati — mavjud kamchiliklarni aniqlash, mas’ul tashkilotlar oldiga aniq vazifalar qo‘yish va ularning amaliy ijrosini nazorat qilishga qaratilgan.

Bir hudud — bir muammo. Bir muammo — aniq chora. Amaliy natija — obod va farovon mahalla.