Olmaliq shahar "Tinchlik" mahalla hududida joylashgan 12-sonli umumta'lim maktabida mahalla va ta'lim muassasasi infratuzilmasini yaxshilash borasida amaliy ishlar davom etmoqda.
Kuni kecha shahar Kengashi deputati Abdujabbor Djurayev tomonidan ilgari surilgan deputatlik soʻrovi ijrosi yuzasidan oʻrganish olib borildi. Soʻrov asosida maktab hududidagi nosoz oqova suv (kanalizatsiya) quvurlari toʻliq yangilanib, ta'mirlash va montaj ishlari muvaffaqiyatli yakunlandi.
Muammolarga yechim: amaliy qadamlar va rejalar
Oʻrganish jarayonida deputat tomonidan hududning yana bir muhim muammosiga e'tibor qaratildi. Maktab va aholi xonadonlari oraligʻidan oʻtgan ichimlik suv quvurlari yillar davomida eskirib, ta'mirtalab holatga kelib qolgani aniqlandi.
Ushbu masalani tezkor va samarali hal etish maqsadida:
Shahar Suv ta'minoti korxonasiga rasmiy deputatlik murojaati yuborilishi belgilandi;
Muammoni bartaraf etishga homiylik mablagʻlarini jalb qilish va texnik ishlarni birgalikda tashkil etish boʻyicha aniq chora-tadbirlar rejasi tuzildi;
Mazkur masala deputatning "Koʻchama-koʻcha aylanish jurnali"ga kiritilib, toʻliq ijro nazoratiga olindi.

Aholi turmush farovonligini oshirish va ta'lim maskanlarida munosib sharoit yaratish yoʻlidagi amaliy ishlar izchil davom ettiriladi.