Ўрганиш давомида туман Кенгашининг 2025 йил 18 сентябрдаги VII-14-80-6-89-K/25-сонли қарори асосида ажратилган маблағлар ҳисобидан амалга оширилаётган Меҳнатобод маҳалла фуқаролар йиғини ички йўлларини асфальтлаш ишлари билан яқиндан танишилди.

Мазкур лойиҳа “Ташаббусли бюджет” жараёнининг 2025 йил 2-босқичи доирасида фуқаролар томонидан илгари сурилган таклифлар асосида энг кўп овоз тўплаб, ғолиб деб топилган. Лойиҳани амалга ошириш учун жами 1 миллиард 499 миллион 842 минг сўм маблағ йўналтирилган.

Ўрганиш жараёнида йўл қурилишининг сифати, асфальт қопламасининг белгиланган техник талабларга мувофиқлиги, қурилиш ишларининг муддати ва аҳоли учун яратилаётган қулайликлар атрофлича кўриб чиқилди. Шунингдек, мутасаддилар томонидан қурилиш ишларини ўз вақтида ва сифатли якунлаш бўйича тегишли тавсиялар берилди.