Xalq deputatlari Ishtixon tumani Kengashi deputati Nasiba Xakimova tomonidan “Beshkapa” mahallasi Suluvqo‘rg‘on qishlog‘i hamda “Katta Qangli” mahallasi Oltiketmon va Chim qishloqlarini bog‘lovchi ichki yo‘lning holati yuzasidan deputat so‘rovi yuborildi.

Aholi bilan o‘tkazilgan uchrashuvlar davomida mazkur yo‘lning qoniqarsiz ahvolda ekani, ayniqsa yog‘ingarchilik mavsumida ko‘lmaklar paydo bo‘lishi hudud aholisi, jumladan maktab o‘quvchilarining harakatlanishida qator qiyinchiliklar tug‘dirayotgani ta’kidlandi.

Ishtixon tuman Obodonlashtirish boshqarmasi boshlig‘ining birinchi o‘rinbosari A.Ibragimov xati bilan ma’lum qilinishicha, hozirgi vaqtda ekologiya tomonidan joriy etilgan moratoriy hamda shag‘al olish uchun karer ajratilmagani sababli yo‘lga shag‘al to‘kish ishlari vaqtincha to‘xtab turgan. Shu masala hal qilinishi bilan yo‘lni shag‘al bilan ta’mirlash ishlari amalga oshiriladi.

Rasmiy javobda ishlar faqat “karer masalasi hal bo‘lgach” amalga oshiriladi deyilgan, ammo hudud aholisi uchun qulay va xavfsiz harakatlanish sharoiti tezroq ta’minlanishi zarur. Bu muammo uzoq muddat davom etishi mumkin, ayniqsa maktab o‘quvchilari va transport harakati uchun xavf tug‘diradi.

Mazkur masala deputat nazoratida bo‘lib, yo‘lni texnik talablar asosida ta’mirlash va hudud aholisi uchun qulay sharoit yaratish yuzasidan amaliy chora-tadbirlar ko‘rilishini nazorat qilmoqda. Aholi murojaatlari e’tibordan chetda qolmasligi, masala tezkor hal qilinishi uchun doimiy monitoring olib boriladi.