Xalq deputatlari Jarqo'rg'on tuman Kengashi kotibiyati mudiri A.Samanov, Kengash raisi D.Xashimova hamda deputatlar A.Toshpo'latov, A.Xamrayev va O.Maxmudovlar bugun "Istiqlol" mahallasidagi "Sport maktabi" faoliyati, "Surxon sohili" mahallasidagi “Paxtakor” stadioni hududida amalga oshirilayotgan ishlar bilan yaqindan tanishdilar.

O‘rganishlar davomida asosiy e’tibor quyidagi jihatlarga qaratildi:

Sport maktabi faoliyati:

Deputatlar tomonidan sport maktabining mavjud moddiy-texnik bazasi, o‘quvchi-sportchilar uchun yaratilgan qulayliklar ko‘zdan kechirildi. Murabbiylarning malakasi va sport anjomlari bilan ta’minlanganlik darajasi tahlil qilindi. Bugungi kunda ushbu maskan yuzlab yoshlarni professional sportga tayyorlash markaziga aylangan.

"Surhon sohili" mahallasidagi “Paxtakor” stadioni faoliyati va undagi yangi loyiha:

Mahalla hududida joylashgan "Paxtakor" stadioni bugun nafaqat futbolchilar, balki barcha yoshdagi aholi uchun salomatlik maskaniga aylangan. Aholi gavjum bo‘ladigan “Paxtakor” stadioni hududida ayni paytda yangi, zamonaviy kurash zali barpo etilmoqda. Deputatlar mazkur sport ob’ektining qurilish sifatini va loyiha parametrlarini tahlil qildilar:

Loyiha quvvati: Bir kunda 150 nafar fuqarolarni qabul qilishga mo‘ljallangan hamda umumiy maydoni: 288 kvadrat metrni tashkil etadi.

O'rganishlar yakunida deputatlar qurilish ishlarini sifatli va belgilangan muddatlarda yakunlash, stadion hududidan aholining unumli foydalanishini tashkil etish, sport maskanlari faoliyatini yanada takomillashtirish bo‘yicha mas’ullarga tegishli tavsiyalar berdilar.

Xalq deputatlari Jarqoʻrgʻon tumani Kengashi