Жорий йилнинг 27 март куни Олий Мажлис Сенатининг Ёшлар, маданият ва спорт масалалари қўмитаси халқ депутатлари Навоий вилояти Кенгаши билан ҳамкорликда навбатдаги мажлиси бўлиб ўтди. Унда “Жисмоний тарбия ва спорт тўғрисида”ги Қонуннинг Навоий вилоятида ижро этилиши ҳолатини ўрганиш натижалари муҳокама қилинди. Мажлисда сенаторлар, вазирлик ва идоралар масъуллари, экспертлар, шунингдек халқ депутатлари
Навоий вилояти Кенгаши аъзолари, спорт ташкилотлари раҳбарлари ҳамда Ёшлар парламенти аъзолари иштирок этди. Мажлисда сенаторлар томонидан қайд этилган камчиликларни бартараф этиш учун қатор таклиф ва тавсиялар билдирилди. Шунингдек, иштирокчилар “Жисмоний тарбия ва спорт тўғрисида”ги Қонунни тубдан қайта кўриб чиқиш
ва уни такомиллаштириш лозимлигини қайд этди. Хусусан, уни янги тушунчалар билан тўлдириш, Қонунда Ўзбекистон Миллий паралимпия қўмитасининг ваколатларини, спорт федерациялари ҳуқуқ ва мажбуриятларини, пуллик хизматларни, спорт соҳасида давлат-хусусий шерикчиликни белгилаш шунингдек, спортнинг сурдлимпия, махсус олимпия ва кўзи ожизлар спорти турлари бўйича янги нормалар киритиш мақсадга мувофиқлиги таъкидланди. Мажлис сўнггида Ёшлар, маданият ва спорт масалалари қўмитаси ҳамда халқ депутатлари Навоий вилояти Кенгашининг қўшма қарори қабул қилинди.