Xabaringiz bor, joriy yilning 5-mart kuni O‘zbekiston Prezidenti Shavkat Mirziyoyev Mirobod tumanida qad rostlagan Oksana Chusovitina ixtisoslashtirilgan gimnastika sport maktabiga tashrif buyurib, u yerdagi sharoitlarni va mashg‘ulotlarni ko‘zdan kechirgan edi. 

Muassasa milliy terma jamoalar uchun xalqaro darajadagi sportchilarni tayyorlash, yuqori malakali murabbiy va mutaxassislarni jalb etib, o‘quv-mashg‘ulot jarayonini xalqaro standartlar darajasida tashkil qilish, murabbiylar va gimnastikachilar mahoratini muntazam oshirib borishga yo‘naltirilgan. 

“Gimnastika – hamma sport turlarining asosi. Futbolchi ham, bokschi ham, sog‘lom bo‘laman degan inson ham gimnastika qilishi kerak. Iqtisodiyotni rivojlantirish, yoshlarga ta’lim berish bilan birga ularni sport bilan shug‘ullantirolsak, yurtimizda sog‘lom zurriyod, sog‘lom millat bo‘ladi”, – deb ta’kidlagandi uchrashuv davomida Prezident. 

Mirobod tuman hokimi va Xalq deputatlari Mirobod tuman Kengash deputatlari birgalikda Oksana Chusovitinani Respublikada gimnastikachilar uchun yagona o‘quv-mashg‘ulot bazasi bo‘lgan ushbu sport maktabi ochilishi bilan samimiy tabriklab, O‘zbekiston faxri bo‘lgan afsonaviy gimnastikachi izdoshlariga Prezident sovg‘alari – zamonaviy planshetlarni topshirdi.