O‘zbekiston Respublikasi Prezidentining PQ–406-son qarori hamda Oliy Majlis Senati Kengashining KQ–35-V-son qarori ijrosini ta’minlash, shuningdek, mahalliy Kengash deputatlari faoliyatining eng muhim yo‘nalishlari bo‘yicha belgilangan 24 ta tavsiya asosida hududlarda deputatlik o‘rganishlari davom ettirilmoqda.

Navbatdagi o‘rganish 11-A.Navoiy saylov okrugi hududidagi A.Navoiy mahallasida o‘tkazildi. Unda saylov okrugi deputati N.Akbarova tomonidan mahalladagi ijtimoiy xizmatlar ko‘rsatish holati, aholining ijtimoiy ehtiyojmand qatlamlari bilan ishlash samaradorligi hamda kam ta’minlangan oilalarga ijtimoiy nafaqa va moddiy yordam tayinlash va to‘lash jarayonlari o‘rganildi.

Ma’lumotlarga ko‘ra, A.Navoiy mahallasida 6319 nafar aholi istiqomat qiladi. Hududda 1440 ta xonadon va 1145 ta oila mavjud. Ijtimoiy reyestrga jami 24 ta oila kiritilgan bo‘lib, shundan 7 tasi kambag‘al oilalar, 17 tasi esa davlat ta’minotidagi oilalar toifasiga mansub.

O‘rganish davomida ijtimoiy xodim tomonidan mazkur oilalarning ehtiyojlarini aniqlash, ularga tegishli ijtimoiy xizmatlarni ko‘rsatish, nafaqa va moddiy yordamni belgilangan tartibda tayinlash hamda to‘lash masalalariga e’tibor qaratildi.

Shuningdek, ijtimoiy ko‘makka muhtoj oilalar bilan individual ishlash, ularning muammolarini o‘z vaqtida aniqlash va mavjud imkoniyatlardan samarali foydalanish muhimligi qayd etildi.

Aniqlangan masalalar yuzasidan tegishli tavsiyalar berilib, ijrosi deputatlik nazoratiga olindi.