Xo‘jabulg‘on mahallasi aholisi murojaati deputatlik so‘roviga asos bo‘ldi

Xalq deputatlari Boysun tuman Kengashining 19-“Xo‘jabulg‘on” saylov okrugidan saylangan deputati Murodov O‘ral Yusupovich tomonidan saylovchilar bilan o‘tkazilgan uchrashuv davomida aholi tomonidan bildirilgan murojaatlar o‘rganildi.

Uchrashuvda fuqarolar Xo‘jabulg‘on mahallasida joylashgan 36-sonli umumta’lim maktabining majlislar zali hamda ko‘mir ombori tom qismi kuchli shamol ta’sirida shikastlangani va yaroqsiz holatga kelib qolgani haqida murojaat qildilar.

Mazkur holat, ayniqsa, kuz-qish mavsumi yaqinlashayotgani munosabati bilan dolzarb masala sifatida qayd etildi. Tom qismlaridagi nosozliklarni bartaraf etmaslik yog‘ingarchiliklar vaqtida binolarning ichki qismiga suv o‘tishi, mol-mulk va elektr jihozlariga zarar yetkazishi, shuningdek, o‘quvchilar hamda maktab xodimlari xavfsizligiga salbiy ta’sir ko‘rsatishi mumkinligi ta’kidlangan.

Shu munosabat bilan deputat tomonidan Boysun tuman maktabgacha va maktab ta’limi bo‘limi mudiri F.Hamidov nomiga 118-ds-398-26-sonli deputat so‘rovi yuborildi.

Deputatlik so‘rovida:

🔹 36-sonli maktab majlislar zali va ko‘mir omborining texnik holatini o‘rganish;

🔹 zarur ta’mirlash ishlari hajmini belgilash;

🔹 qurilish materiallari bilan ta’minlashda amaliy yordam ko‘rsatish;

🔹 ta’mirlash ishlarini kuz-qish mavsumi boshlangunga qadar amalga oshirish;

🔹 zarur hollarda moliyalashtirish manbalarini aniqlash;

🔹 o‘quvchilar va maktab xodimlari xavfsizligini ta’minlash bo‘yicha choralar ko‘rish;

🔹 amalga oshirilgan ishlar haqida belgilangan tartibda yozma ma’lumot taqdim etish so‘ralgan.

Mazkur deputatlik so‘rovi aholi murojaatlarini o‘rganish, aniqlangan muammolarni mas’ul tashkilotlar bilan hamkorlikda hal etish hamda ta’lim muassasalarida xavfsiz sharoitlarni ta’minlashga qaratilgan.

Maqsad — aholi murojaatlarini e’tiborsiz qoldirmaslik, mavjud muammolarni o‘z vaqtida aniqlash va ularning amaliy yechimini ta’minlash.