Xalq deputatlari Chilonzor tumani Kengashi deputati Xidiyatulina Rima Rashitovna 8-Lutfiy saylov okrugi hududidagi "1-Qatortol" mahallasida bo‘lib, hududning sanitariya-tozaligi hamda maishiy chiqindilarni o‘z vaqtida olib chiqish holatini joyiga chiqib o‘rgandi.

O‘rganish davomida Qatortol 2-tor ko‘chasi 1A va 12-uylar atrofida maishiy chiqindilar to‘planib qolganligi aniqlandi. Mazkur holat hududning sanitariya-gigiyena talablariga javob bermasligi, atrof-muhitning ekologik holatiga salbiy ta'sir ko‘rsatishi hamda fuqarolar uchun noqulayliklar tug‘dirayotgani qayd etildi.

Aniqlangan muammoning kelib chiqish sabablari o‘rganilib, mazkur hududda aholi soni va ehtiyojidan kelib chiqib maishiy chiqindilarni yig‘ish uchun mavjud infratuzilmani takomillashtirish zarurligi ta'kidlandi. Xususan, ushbu manzilga qo‘shimcha maxsus maishiy chiqindi konteynerlarini o‘rnatish orqali chiqindilarni tartibli yig‘ish va o‘z vaqtida olib chiqish tizimini yo‘lga qo‘yish maqsadga muvofiqligi bildirildi.

Deputat tomonidan ushbu masala yuzasidan hududning sanitariya holatini yaxshilash, ekologik osoyishtalikni ta'minlash hamda fuqarolar uchun sog‘lom va qulay yashash muhitini yaratish maqsadida mas'ul tashkilotlar tomonidan tegishli o‘rganishlar o‘tkazilib, amaliy choralar ko‘rilishi yuzasidan tegishli takliflar ilgari surildi. Mazkur masala deputatlik nazoratiga olindi.