Ekspert guruhi – mahalliy Kengashlar faoliyati samaradorligini oshirishga xizmat qiladi

Oʻzbekiston Respublikasi Oliy Majlisi Senati Kengashining “Xalq deputatlari viloyat, tuman va shahar Kengashlari huzurida ekspert guruhi tashkil qilish toʻgʻrisida”gi qarori mahalliy vakillik organlari faoliyatini yanada takomillashtirish, qabul qilinayotgan qarorlarning sifatini oshirish hamda hududlarni rivojlantirishga qaratilgan muhim hujjat hisoblanadi.

Mazkur qarorga muvofiq, xalq deputatlari viloyat, tuman va shahar Kengashlari huzurida turli sohalardagi malakali mutaxassislar, olimlar, tajribali amaliyotchilar va jamoatchilik vakillaridan iborat ekspert guruhlari tashkil etiladi. Ushbu guruhlar Kengashlar tomonidan ko‘rib chiqilayotgan masalalarni chuqur tahlil qilish, ilmiy-amaliy xulosalar tayyorlash hamda asoslantirilgan takliflar ishlab chiqishda ko‘maklashadi.

Ekspert guruhlarining faoliyati hududlarni ijtimoiy-iqtisodiy rivojlantirish, aholi farovonligini oshirish, mahalliy budjet mablag‘laridan samarali foydalanish, investitsiyalarni jalb etish va dolzarb muammolarga yechim topishda muhim ahamiyat kasb etadi. Shuningdek, ular Kengashlarning nazorat funksiyalarini yanada kuchaytirish va qarorlar ijrosi ustidan samarali monitoring olib borishga xizmat qiladi.

Bugungi kunda mahalliy davlat hokimiyati organlari faoliyatida ochiqlik, shaffoflik va jamoatchilik ishtirokini kengaytirish ustuvor vazifa etib belgilanmoqda. Ekspert guruhlarining tashkil etilishi esa ushbu maqsadlarga erishishda muhim mexanizmlardan biri bo‘lib, hududlarni rivojlantirishga qaratilgan tashabbus va loyihalarning sifatli amalga oshirilishiga zamin yaratadi.

Yangi Oʻzbekistonda mahalliy Kengashlarning vakolati va mas’uliyati ortib borayotgan bir paytda, ekspert guruhlari faoliyati xalq manfaatlariga xizmat qiladigan, puxta o‘ylangan va samarali qarorlar qabul qilinishida muhim omil bo‘lib xizmat qiladi.