Deputatlar tomonidan aholi muammolari o‘rganildi 

Xalq deputatlari
Quva tuman Kengashi deputatlari tomonidan tumandagi Bahor mahalla fuqarolar yig‘iniga
qarashli Moy qishlog‘iga amaliy tashrif uyushtirildi. Mazkur qishloq o‘ziga xos
tabiiy-relef xususiyatlariga ega bo‘lib, qo‘shni Qirg‘iz Respublikasi bilan davlat
chegarasiga yaqin hududda joylashgani bilan ahamiyatli hisoblanadi. 

Amaliy tashrif
davomida qishloqning ijtimoiy hamda muhandislik-kommunikatsiya infratuzilmasi holati
atroflicha o‘rganildi. Xususan, ichki yo‘llar sifati, ichimlik suvi bilan ta’minlanish
darajasi, elektr energiyasi ta’minoti barqarorligi, shuningdek, hududda olib borilayotgan
obodonlashtirish va ko‘kalamzorlashtirish ishlari bilan yaqindan tanishildi. 

Shuningdek,
deputatlar tomonidan qishloq aholisi bilan ochiq va samimiy muloqot shaklida uchrashuv
o‘tkazilib, fuqarolarni qiynayotgan mavjud muammolar, kundalik turmushda uchrayotgan
masalalar, shuningdek, ularning taklif va murojaatlari batafsil tinglandi. Uchrashuv
davomida aholi tomonidan bildirilgan taklif va tashabbuslar ijobiy baholandi. 

Ko‘tarilgan
muammolarni bosqichma-bosqich hal etish, mavjud kamchiliklarni bartaraf qilish hamda
aholi turmush sharoitini yanada yaxshilash maqsadida mas’ul tashkilot va idoralar
rahbarlariga tegishli tavsiya va topshiriqlar tayyorlandi va mazkur masalalarning
ijrosi deputatlik nazoratiga olinishi ta’kidlandi.