Xalq deputatlari Ishtixon tumani Kengashi deputati Abdug‘aniyev Samo Nizomovich tomonidan “Mitan–Chaqar” avtomobil yo‘lining To‘por mahallasi hududidan o‘tuvchi qismi yuzasidan deputat so‘rovi chiqarildi.

Aholi hamda “mahalla yettiligi” bilan o‘tkazilgan uchrashuvlar davomida mazkur yo‘lning bugungi kunda ta’mirtalab holatga kelib qolgani bo‘yicha ko‘plab murojaatlar bildirildi.

E’tiborlisi shundaki, ushbu yo‘l 2025-yilda ta’mirlangan bo‘lishiga qaramasdan, yog‘ingarchiliklar natijasida yo‘l qoplamasida qayta chuqurlar paydo bo‘lgan. Bu esa:

• avtomobillar harakatiga jiddiy noqulaylik tug‘dirmoqda;
• piyodalar xavfsizligiga salbiy ta’sir ko‘rsatmoqda;
• hududda joylashgan qabristonga borib-kelishda fuqarolar uchun qiyinchiliklar yuzaga keltirmoqda.

Shu munosabat bilan Ishtixon tumani Yo‘llardan foydalanish unitar korxonasi direktori J. Dagarov nomiga yo‘lning mazkur qismini joyiga chiqib o‘rganish, mavjud nosozliklarni aniqlash hamda tegishli ta’mirlash ishlarini amalga oshirish bo‘yicha amaliy choralar ko‘rish yuzasidan deputat so‘rovi yuborildi.

Qonunchilikka muvofiq, so‘rovga 10 kun muddatda asoslantirilgan javob taqdim etilishi lozim.

⚠️ Masala sifat va mas’uliyat bilan bog‘liq

Yaqinda ta’mirlangan yo‘lning qisqa muddatda yaroqsiz holatga kelishi jamoatchilikda haqli savollar uyg‘otadi. Mas’ullar hududga chiqib, holatni atroflicha o‘rganishi, bajarilgan ishlar sifati bo‘yicha aniqlik kiritishi hamda muammoni tezkor bartaraf etishi zarur.

Yo‘l — bu qulaylik emas, xavfsizlik masalasidir. Ushbu masala deputat nazoratiga olingan.