Toshkent — Markaziy Osiyo mamlakatlari yetakchi ayollar muloqoti markaziga aylanmoqda

Bugun Toshkent shahrida Markaziy Osiyo mamlakatlari yetakchi ayollari muloqotining navbatdagi majlisi o‘z ishini boshladi. Ushbu nufuzli anjuman mintaqadagi davlatlar o‘rtasidagi do‘stlik va hamjihatlik rishtalarini mustahkamlash, shuningdek, ayollarning ijtimoiy-siyosiy, iqtisodiy va madaniy hayotdagi faolligini oshirishga qaratilgan muhim minbar hisoblanadi.

Anjumanda O‘zbekiston, Qozog‘iston, Qirg‘iziston, Tojikiston va Turkmanistondan tashrif buyurgan delegatsiyalar ishtirok etmoqda. Ular orasida davlat va jamoat arboblari, parlament a’zolari, faol tadbirkor ayollar, yoshlar va fuqarolik jamiyati vakillari bor.

Muloqot doirasida gender tengligini ta’minlash, oilani mustahkamlash, xotin-qizlarning ta’lim, ilm-fan va tadbirkorlik sohalaridagi ishtiroki kabi masalalar muhokama etilmoqda. Shuningdek, mintaqaviy hamkorlikni kengaytirish, barqaror rivojlanish va tinchlikni ta’minlash yo‘lida ayollar o‘rtasidagi hamkorlikni yanada chuqurlashtirish muhim yo‘nalish sifatida belgilab olindi.

O‘zbekiston Respublikasi Prezidentining oila va xotin-qizlar masalalariga qaratayotgan e’tibori tufayli bugun mamlakatimizda ayollar faoliyatini qo‘llab-quvvatlash, ularning huquq va manfaatlarini himoya qilish, iqtidorli xotin-qizlar uchun yangi imkoniyatlar yaratish bo‘yicha keng islohotlar amalga oshirilmoqda.

Shu jihatdan Toshkentda o‘tayotgan mazkur anjuman nafaqat mintaqaviy ahamiyatga ega, balki butun dunyo miqyosida ayollarning ijtimoiy va siyosiy faolligini oshirishga xizmat qiluvchi muhim qadam sifatida baholanmoqda.

Biz ayollarning tinchlikparvarlik, ezgulik va barqaror taraqqiyot yo‘lidagi tashabbuslarini qo‘llab-quvvatlaymiz hamda mazkur muloqot kelgusida Markaziy Osiyo davlatlari o‘rtasida yanada samarali hamkorlikka asos solishiga ishonamiz.

🇺🇿Xalq deputatlari Navoiy shahar kengashi deputati Irgasheva Nilufar Uralovna