Jumladan, Mo‘liyon Poyon MFY aholisi hozirgi vaqtda mahallada 540 ta xonadon mavjudligi, 2023-yilda ularning 250 ga yaqini gazlashtirilganini, qolgan xonadonlar esa hanuzgacha gaz bilan ta’minlanmaganini ma’lum qildilar. Ushbu holat aholining noroziligiga sabab bo‘layotgani ta’kidlandi.

 Mazkur muammo yuzasidan fuqarolar bir necha bor shahar va viloyat hokimi sayyor qabullarida murojaat qilgan bo‘lsalar-da, masala hanuzgacha o‘z yechimini topmaganini bildirdilar.

Shuningdek, aholi hozirda suyultirilgan gaz ballonlari orqali ta’minlanayotganini, ilgari 35–40 kun oralig‘ida yetkazib berilgan gaz hozirda 70–75 kungacha cho‘zilayotgani sababli qiyinchiliklar yuzaga kelayotganini qayd etdilar.

 Bundan tashqari, Mo‘liyon Poyon MFYning Shahar ko‘chasida joylashgan 2 km yo‘lning juda yomon holatga kelib qolgani, ushbu yo‘ldan bir nechta mahalla aholisi hamda qabristonga boruvchilar foydalanishi bois, ayniqsa yog‘ingarchilik mavsumida harakatlanish qiyinlashayotgani bildirildi.

 Shu kabi muammolar Maroqand MFY hududida ham kuzatilib, 47-umumta’lim maktabi va 112-sonli DMTT jamoasi tomonidan yo‘llarning yaroqsiz holatga kelgani yuzasidan murojaatlar bildirildi.

 Xususan, Ganjkorlar ko‘chasining 1 km qismi og‘ir ahvolda ekani, ushbu yo‘ldan 5 ta qo‘shni mahalladan mingga yaqin o‘quvchi-yoshlar va bog‘cha tarbiyalanuvchilari foydalanayotgani, yog‘ingarchilikda esa yo‘lda sun’iy ko‘llar hosil bo‘layotgani ta’kidlandi.

 Shuningdek, Maroqand MFY aholisi 2023-yilda Do‘stlik ko‘chasiga o‘rnatilgan 20 ta beton ustunlarga hanuz elektr tarmoqlari ulanmagani, qo‘shimcha ravishda yana 10 ta ustun zarurligini bildirdilar. Maroqand ko‘chasiga ham qo‘shimcha 10 ta ustun kerakligi aytib o‘tildi.

 Aniqlangan muammolar yuzasidan deputatlar tomonidan tegishli chora-tadbirlar ishlab chiqilib, ular deputatlik so‘rovlari orqali nazoratga olindi.