Hozirgi kunda har bir davlat taraqqiyotining asosi - bilimli va malakali kadrlardan iborat. Mamlakatimiz rahbari, kelajakni belgilashda ta’lim tizimini ustuvor yo‘nalish sifatida belgilagani barchamiz uchun muhim ahamiyatga ega. Kuni-kecha Prezidentimiz Shavkat Mirziyoyev rahbarligida o‘tkazilgan maktabgacha ta’lim va maktab ta’limi sohasidagi videoselektor yig‘ilishi ta’lim sohasida yangi davrning boshlanishi sifatida tariximizga kirdi.

         Yig‘ilishda ta’lim sohasida olib borilayotgan islohotlarning asosiy maqsadi va kelgusidagi vazifalari aniq belgilandi. Avvalo, ta’lim tizimidagi eng muhim maqsad - har bir bolaning o‘z salohiyatini ro‘yobga chiqarish va ularni milliy hamda umumjahon qadriyatlari asosida tarbiyalab, barkamol shaxs sifatida shakllantirishdir. Shu nuqtai nazardan, maktabgacha ta’lim tizimidagi islohotlar alohida ahamiyatga ega. Yangi bog‘chalar qurilishi, eski bog‘chalarni modernizatsiya qilish va tarbiyachilarning malakasini oshirish bu jarayonning ajralmas qismidir. 182 ming yangi o‘rin yaratish rejalashtirilmoqda, bunda yangi bog‘chalar qurilishi muhim o‘rin tutadi. Tarbiyachilarning malakasi oshirilmoqda, ularning maoshlarini yaxshilash esa tarbiya sifatiga ijobiy ta’sir ko‘rsatadi. Davlat-xususiy sheriklik asosida bog‘chalar qurishga mo‘ljallangan uch yillik dastur ishlab chiqilmoqda, bu esa sohada yangi imkoniyatlarni yaratadi va xizmat ko‘rsatish sifatini oshiradi.

        Pedagoglar va tarbiyachilarning ijtimoiy ahvolini yaxshilash, ularning mehnatini rag‘batlantirish maqsadida maoshlariga ustamalar joriy etilmoqda. Bugungi kunda 60 mingdan ortiq pedagog 10 million so‘mdan yuqori maosh olmoqda, bu esa ularning kasbiy faoliyatini yanada kuchaytirishga imkon beradi. Yangi baholash tizimi asosida ijobiy natijalar ko‘rsatgan maktablar va pedagoglar ustamalar bilan taqdirlanmoqda, bu esa ta’lim sifatini oshirishga katta turtki bo‘lishi albatta kutilmoqda.

        Maktab ta’limida innovatsiyalarni joriy etish ham juda muhim ahamiyat kasb etadi. 1-sinfda informatika darslari yo‘lga qo‘yildi, kelgusi o‘quv yilidan sun’iy intellekt bo‘yicha darslar kiritilishi rejalashtirilmoqda. Bu esa yoshlarimizning zamonaviy texnologiyalar bilan tanishishi va ularni samarali foydalanishiga xizmat qiladi. Iqtidorli o‘quvchilar uchun ixtisoslashtirilgan maktablar soni ko‘paytirilmoqda, eng nufuzli 2 ta - xalqaro kimyo va informatika olimpiadalari ilk bor mamlakatimizda o‘tkaziladi, bu esa yurtimizning xalqaro maydondagi nufuzini yanada oshiradi.

        Yoshlarni kasb-hunarga o‘rgatish va bandligini ta’minlash masalasi ham davlatimiz rahbarining alohida e’tiborida. Texnikumlar va kasbga o‘rgatadigan muassasalarda xalqaro standartlar joriy etilmoqda va dual ta’lim tizimi kengaytirilmoqda. Bu esa yoshlarga ishbilarmonlik ko‘nikmalarini oshirishga xizmat qiladi. 

Nilufar AKRAMOVA,

“Adolat” SDP Toyloq tuman Kengashi raisi, tuman Kengashi deputati.