Халық депутатлары Қоңырат районлық Кеңесинде ӨзЛиДеП депутатлық топарының мәжилиси болып өтип, онда Өзбекстан Республикасы Президентиниң 2023-жыл 16-февральдағы "2023-жылда қайта тиклениўши энергия дәреклерин ҳәм энергия үнемлеўши технологияларды енгизиўди жеделлестириў ис-илажлары ҳаққында"ғы ПҚ-57-санлы қарарының орынланыўы бойынша "Аймақлық электр тармақлары" АЖ Қоңырат районлық филиалының есабаты тыңланды.

Мәжилисте районлық филиал баслығы Оразғали Муханов баянат жасап, депутатларға 2025-жылдың тоғыз айында әмелге асырылған жумыслар, әҳмийетли машқалалар, жақын келешекке мөлшерленген режелер ҳаққында мағлыўмат берди.

Президент қарарының 20-бәнтине муўапық, район аймағында киши ҳәм микро гидроелектр станцияларын шөлкемлестириў, социаллық, мәмлекетлик ҳәм жеке меншик обектлерде қуяш панеллерин жедел енгизиў илажлары баслап жиберилди. Атап айтқанда, 2025-жылдың 9 айы даўамында төмендеги жумыслар әмелге асырылды:

• 24 социаллық ҳәм мәмлекетлик мәкемелерде жәми 385 кВт қуўатлылыққа ийе қуяш панельлери орнатылды;

• исбилерменлик субектлерине тийисли 25 объектте 1326 кВт қуўатлылықтағы панеллер жайластырылды;

• 312 жеке меншик хожалықта улыўма қуўатлылығы 1545 кВт болған қуяш панеллери орнатылды.

"USTYURT SODIUM SULFATE" кәрханасында 1000 кВт қуўатлылықтағы қуяш панельлери орнатылғаны қайта тиклениўши энергия дәреклерин нәтийжели енгизиўдиң айқын мысалы болды. Қолланба энергия дерегине өткенге шекем кәрхананың электр энергиясы ушын айлық қәрежети 360 миллион сумды қураған болса, панеллер орнатылғаннан соң бул муғдар 230 миллион сумға түсип, айына 130 миллион сум үнемленген.

Пуқаралардың белсене қатнасыўы да дыққатқа ылайық. Соның ишинде, Әжинияз мәҳәллесинде жасаўшы Нуркен Алдамуратов өз үйине 50 кВт қуўатлылықтағы қуяш панеллерин орнатып, басқаларға өрнек болмақта. Бул  арқалы оның айлық сап дәраматы 9,2 миллион сумды қурамақта. Әмелге асырылған илажлар нәтийжесинде жәми 4,7 миллион кВт/сааттан аслам электр энергиясының үнемлениўине ерисилди.

Мәжилисте, сондай-ақ, "Салық" мобил қосымшасындағы "Қуяшлы шаңарақ" бөлими арқалы 2025-жылы 312 жеке меншик шаңарақтан қуяш панеллерин орнатыў бойынша мүрәжатлар келип түскени атап өтилди. Барлық мүрәжатлар жеделлик пенен көрип шығылып, орынлаўға қабыл етилди. Сондай-ақ, артықша ислеп шығарылған электр энергиясын сатыў бойынша тийисли алды-сатты шәртнамалары дүзилди.

ӨзЛиДеП депутатлар топары әмелге асырылған жумыслардан қанаатланды ҳәм  бул бағдардағы жумысты даўам еттириў, әсиресе, алыс ҳәм кем тәмийинленген аймақларда альтернатив энергия дәреклерин кеңнен енгизиў зәрүрлигин атап өтти.

Жуўмақлап айтқанда, Президенттиң ПҚ-57-санлы қарарының орынланыўы тек ғана энергияны үнемлеўди арттырыў ҳәм орайласқан тармақларға болған жүклемени азайтыўға емес, ал "жасыл экономика"ны раўажландырыў, екологиялық турақлылықты тәмийинлеў ҳәм халықтың турмыс дәрежесин жақсылаўға хызмет етпекте.