Фармонда маҳаллий Кенгаш қарори билан лавозимга тасдиқланадиган, тайинланадиган, Кенгашга ҳисобдор бўлган мансабдор шахсларнинг маҳаллий Кенгашлар олдидаги жавобгарлигини белгилаш вазифаси қўйилмоқда. Бунда ижро этувчи ҳокимият органлари ҳудудий бўлинмаларининг мансабдор шахсларига нисбатан эгаллаб турган лавозимига нолойиқлиги, интизомий жавобгарликка тортиш бўйича юқори турувчи органга тақдимнома киритиш каби чораларни белгилаш назарда тутилмоқда.

Ҳоким ўринбосарларининг Кенгашлар олдидаги масъулияти оширилмоқда

Фармон билан эндиликда вилоят, туман (шаҳар) ҳокими ўринбосарлигига номзодларни тегишли маҳаллий Кенгашлар доимий комиссияларида дастлабки тарзда муҳокама қилиш, Кенгаш сессияларида номзодларнинг ўз йўналишлари бўйича ҳудудни ривожлантириш дастурларини тақдим этиш тартибини жорий этиш белгиланмоқда.

Ҳудудлардаги муаммоларга Кенгашларнинг тезкор муносабат билдириш имкониятлари оширилмоқда

Эндиликда ҳудди парламентдаги “Ҳукумат соати” каби маҳаллий кенгаш депутатларининг шошилинч вазиятларда тезкор жавоб беришни талаб қиладиган сўровларига сессия чақирмасдан, муайян миқдордаги депутатлар ва жамоатчилик вакиллари иштирокида маҳаллий ижро этувчи ҳокимият органлари раҳбарларининг айрим муҳим ижтимоий масалалар юзасидан ахборотларини эшитиш бўйича “Кенгаш соати” институтини жорий қилиш таклиф қилинмоқда.

Маҳаллий Кенгашлар фаолиятининг ташкилий-институционал асослари такомиллаштирилмоқда, фуқаролар иштироки, очиқлик, шаффофлик кўлами оширилмоқда

Фармонда маҳаллий Кенгашлар фаолиятининг ташкилий-институционал асосларини такомиллаштириш, уларнинг моддий-техник базаси ва кадрлар салоҳиятини мустаҳкамлаш чоралари белгиланмоқда.

Маҳаллий Кенгаш депутатларининг ҳуқуқлари ва қонуний манфаатларини, бошқа демократик қадриятларни ҳимоя қилиш мақсадида депутатларга уюшмаларга бирлашиш имконияти берилмоқда.

Маълумот ўрнида қайд этиш жоизки, ўхшаш уюшмалар АҚШ, Канада, Европанинг 46 та мамлакатида, Осиё (Япония, Жанубий Корея, Ҳиндистон, Индонезия, Малайзия) ва МДҲ (Арманистон, Беларусь, Грузия, Молдова, РФ, Озарбайжон, Қозоғистон, Қирғизстон) мамлакатларининг аксариятида мавжуд.

Маҳаллий Кенгашларда маҳаллий ижро этувчи ҳокимият органлари раҳбарларининг ҳисоботларини эшитиш тизимини такомиллаштириш, бунда ҳисоботларни (ахборотларни) эшитишнинг даврийлигини қайта кўриб чиқиш, айримларини заруратга кўра эшитиш тартибига ўтказиш белгиланмоқда.

Маҳаллий Кенгаш қарорларини қабул қилиш жараёнларининг очиқлигини таъминлаш мақсадида фуқароларнинг сессия ишини бевосита кузатиш тизимини йўлга қўйиш, маҳаллий Кенгаш сессияларида фуқароларнинг сессия ишига аралашиш ҳуқуқисиз кузатувчи сифатида иштирок этиш тартибини белгилаш вазифаси юкланмоқда.

Фуқаролар томонидан маҳаллий Кенгашларга электрон жамоавий мурожаат қилиш бўйича янгича тизим яратилади.

Шунингдек, маҳаллий давлат ҳокимияти вакиллик органлари халқаро ҳамкорлигининг ҳуқуқий асосларини мустаҳкамлаш чоралари назарда тутилмоқда.

Маҳаллий кенгашларнинг норма ижодкорлик ваколатлари кенгайтирилмоқда

Фармон билан маҳаллий аҳамиятга молик 5 та ваколатларни маҳаллий Кенгашларга ўтказиш белгиланди.

Хусусан, ҳозирда ҳокимлар ваколатларида бўлган мажбурий тўлов ва маҳаллий йиғимлар миқдорини белгилаш бўйича: давлат кўчмас мулкидан фойдаланганлик учун ижара тўловининг энг кам ставкалари, дафн этиш жойларини сақлаш қоидаларини тасдиқлаш, дафн этиш хизматларини кўрсатиш бўйича тарифлар миқдорини белгилаш ваколатлари Кенгашларга ўтказилиши белгиланмоқда.

Шунингдек, ижтимоий муҳофазага муҳтож, иш топишда қийналаётган ва меҳнат бозорида тенг шартларда рақобатлаша олмайдиган шахсларни ишга жойлаштириш учун иш ўринларининг энг кам сонини белгилаш ва захирага қўйиш, йўлларнинг айрим қисмларида ҳаракатланиш тезлигини оширишга ёки камайтиришга (тегишли йўл белгилари ўрнатиб) рухсат бериш ваколатлари Кенгашларга ўтказилиши мустаҳкамланмоқда.

Хулоса қилиб айтганда, маҳаллий бошқарувнинг энг яхши шакли – бу халқ вакиллари иштирок этадиган, аҳолига хизмат қиладиган бошқарувдир. Аҳолини бирлаштириб турувчи сифатида маҳаллий Кенгаш қанча кучли бўлса давлат кучли бўлади.

Зомин туман Кенгаши котибият мудири М.Ғоибназаров