Xabaringiz bor, Prezidentimiz Shavkat Mirziyoyevning tashabbusi bilan Parkent tumanida amalga oshirilayotgan ko‘plab yirik loyihalardan biri sifatida markaziy ko‘prikda qurilish-ta’mirlash ishlari olib borilayotgandi. Mazkur ko‘prik zamonaviy ko‘rinishga keltirilib, rekonstruksiya ishlari o‘z yakuniga yetdi. Tumanimiz aholisi orziqib kutayotgan ushbu zamonaviy ko‘prikning foydalanishga topshirilayotganligi munosabati bilan tadbir bo‘lib o‘tdi.Unda tuman hokimi Sardor Isoqulov boshchiligida tumanimizdagi davlat va jamoat tashkilotlarining rahbarlari, tuman Kengashi deputatlari, nuroniylar, yoshlar, mahalla faollari ishtirok etdi.Tadbirda hokim
so‘zga chiqib, tumanimiz aholisini markaziy ko‘prikning foydalanishga topshirilishi bilan samimiy qutladi.Shundan so`ng tuman Kengashi deputati X.Muxitdinov so`zga chiqib tumanimizdagi keng bunyodkorlik ishlari xaqida o`z fikrlarini bildirdi. Ta’kidlanganidek, ilgari shu ko‘prikdagi tirbandlik bu yerdan o‘tib qaytuvchi aholi uchun juda katta muammo tug‘dirayotgandi. Ayniqsa, haydovchilarning ko‘prik yaqiniga mashinalarini qo‘yib ketishi ham muammolarni ko‘paytirayotgandi.Mazkur ko‘prikni rekonstruksiya ishlari davomida unga bog‘lanadigan yo‘llar ham kengaytirildi. Ko‘prikning yonidan o‘tuvchi yo‘l tunnel orqali Yettikent bekati qarshisidan Zarkent va So‘qoq tomonga olib boruvchi markaziy yo‘lga ulandi.Ilgari ko‘prik 43 metr, 2 tasmali, kengligi 10 metr edi. Undan bir sutkada o‘rtacha 2 ming 500 ta avtomobil o‘ta olardi. Bunyodkorliklar sabab, bu ko‘prikning uzunligi 57 metr bo‘lib, 6 tasmali, kengligi esa 24 metrga yetkazildi.Endi ko‘prik orqali bir sutkada o‘rtacha 7 ming 500 dan ortiq avtomobil tez va xavfsiz o‘tishi mumkin.Bu o‘z navbatida Parkent tumani aholisi, qolaversa, hududga kelayotgan sayyoh va mehmonlarning manziliga tezroq yetib borishlarida vaqtini tejaydi.