Ommaviy sportga bo‘lgan e’tibor – yoshlar tarbiyasida muhim omil

Yurtimizda jismoniy tarbiya va sportni ommalashtirishga, ayniqsa mahallalardagi uyushmagan yoshlarni sportga keng jalb etishga alohida e’tibor qaratilmoqda. Bu borada amalga oshirilayotgan ishlarning yorqin namunasidan biri – “Besh tashabbus” doirasida tashkil etilayotgan ommaviy sport musobaqalaridir.

Termiz tumanidagi 31-sonli umumta’lim maktabida o‘quvchi yoshlar o‘rtasida kurash bo‘yicha musobaqa tashkil etildi. Musobaqada 7 ta vazn toifasidagi yosh sportchilar o‘zaro kuch sinashib, katta shavq va ruh balandligida bellashdilar.

Bellashuvlar yakunida g‘olib va sovrindor sportchilar diplom va esdalik sovg‘alari bilan taqdirlandi. Tantanali taqdirlash marosimida Xalq deputatlari Termiz tuman Kengashining 10-Yangi yo‘l saylov okrugidan saylangan deputati R. Shamanov ishtirok etib, musobaqa g‘oliblarini samimiy tabrikladi hamda ularga kelgusi faoliyatlarida muvaffaqiyatlar tiladi.