🌐Bugungi kunda korrupsiya butun dunyo mamlakatlarining ijtimoiy-iqtisodiy rivojiga tahdid solayotgan eng dolzarb muammolardan biridir. U nafaqat davlat boshqaruvi tizimini izdan chiqaradi, balki jamiyatda adolat va tenglikka bo‘lgan ishonchni yemiradi. Shu boisdan ham korrupsiyaga qarshi kurash har bir fuqaroning sha’ni, or-nomusi va burchi bo‘lishi zarur.

Yurtimizda ushbu illatga qarshi tizimli va qat’iy kurash olib borilmoqda. Prezidentimiz tashabbuslari bilan so‘nggi yillarda qabul qilingan qonunlar, Davlat xizmatini rivojlantirish agentligi, Korrupsiyaga qarshi kurashish agentligi va boshqa tashkilotlar faoliyati bu yo‘nalishda muhim bosqichlarni bosib o‘tdi. “Korrupsiyasiz soha” tamoyili asosida ta’lim, sog‘liqni saqlash, ichki ishlar, soliq va bojxona tizimlarida shaffoflikni ta’minlash bo‘yicha katta ishlar qilinmoqda.

Ammo davlatning harakatlari bilan birga, oddiy fuqarolarning ham faol ishtiroki bu kurashda hal qiluvchi ahamiyatga ega. Har birimiz hayotimizda, ish joyimizda yoki jamoat joylarida yuzaga kelishi mumkin bo‘lgan noqonuniy holatlarga befarq bo‘lmasligimiz lozim. Shubhali vaziyatlarda tegishli tashkilotlarga murojaat qilish, fuqarolik pozitsiyasini ko‘rsatish, ayni damda eng katta jasoratdir.

Shuningdek, korrupsiyaga qarshi kurashning samarali yo‘li bu – ta’lim va ma’naviyatdir. Yoshlarga halollik, adolat, mas’uliyat kabi ezgu fazilatlarni singdirish orqali biz ertangi kunning pok jamiyatini yaratishimiz mumkin. Zero, korrupsiyaga yo‘l ochiladigan joyda taraqqiyot emas, tanazzul hukmron bo‘ladi.

Yurtimiz kelajagi, xalqimiz farovonligi va adolatli jamiyat qurilishi yo‘lida korrupsiyaga qarshi kurashish har birimizning vijdoniy va fuqarolik burchimizdir. Halollik va qonun ustuvorligi – biz tanlagan yo‘l. Shu yo‘ldan chekinmasligimiz lozim!

Xalq deputatlari Samarqand viloyat 

Kengashi deputati Sh.Djalolov