9-may - Eslew hám qádirlew kúni

Ǵárezsizlik jıllarınan berli xalqımız, ásirler dawamında biziń tuwılǵan úlkemizdi, onıń azatlıǵın, paraxat turmısın, qaharmanlıq hám pidákerlik penen qorǵaǵan watanlaslarımızdıń húrmetin este saqlap bul sáneni saltanatlı túrde belgilep kelmekte.

Búgin Taxtakópir rayonında 9-may - Eslew hám qádirlew kúni jáne Ekinshi jer júzilik urısta erisilgen jeńistiń 80 jıllıǵı múnásibeti menen bayram ilajı bolıp ótti.

Ilajda rayon hákimi J.Adilov, deputatlar, qorǵanıw bólimi xızmetkerleri, miynet veteranları, Awǵanstan jerinde áskeriy minnetin orınlaǵan jawıngerler hám keń jámiyetshilik wákilleri qatnastı. Olar rayon orayındaǵı «Sheyitler esteligi»ne gúl qoyıp, el-jurt tınıshlıǵı jolında janın pidá etken ata-babalarımızdı húrmet penen eske aldı.

Bunnan soń rayon hákimi J.Adilov hám basqalar sózge shıǵıp, urıs hám onnan keyingi jıllarda pidákerlik penen miynet etken veteranlarımızdı usı dańqlı sáne menen qutlıqlap, olardıń ómir jolı búgingi áwlad ushın úlgi ekenligin atap ótti.