«Обод» маҳалласида инфратузилма янгиланмоқда

Муҳтарам Президентимизнинг 2026 йил 5 февралдаги ПҚ–49-сон қарори ижроси доирасида «оғир маҳалла» сифатида белгиланган «Обод» маҳалла фуқаролар йиғинида аҳоли учун муносиб турмуш шароитларини яратишга қаратилган кенг кўламли қурилиш ва ободонлаштириш ишлари амалга оширилмоқда.
Янгиқўрғон тумани ҳокими, Халқ депутатлари Янгиқўрғон тумани Кенгаши депутати Нажмиддинов Асадулла Икромович ўзи сайланган округ ҳудудида олиб борилаётган бунёдкорлик ишларини жойига чиққан ҳолда ўрганди.
Ўрганиш жараёнида амалга оширилаётган ишлар сифати ва суръати кўздан кечирилиб, масъулларга тегишли кўрсатмалар берилди. Шунингдек, маҳалла аҳолиси билан мулоқот қилиниб, уларнинг таклиф ва мурожаатлари тингланди.
Хусусан, маҳаллада 3 миллиард сўм маблағ эвазига 3,9 километр канализация тармоғини тортиш ҳамда 3,3 километр ички йўлларни асфальтлаш ишлари жадал суръатларда олиб борилмоқда.
Мазкур лойиҳалар аҳолининг коммунал хизматлардан фойдаланиш имкониятларини янада яхшилаш, ҳудуддаги санитария ҳолатини мустаҳкамлаш, ички йўллар сифатини ошириш ва транспорт инфратузилмасини ривожлантиришга хизмат қилади.
Бу каби амалий чора-тадбирлар натижасида маҳаллада яшовчи фуқаролар ва тадбиркорлар учун янада қулай, хавфсиз ва замонавий шарт-шароитлар яратилмоқда.