Yig‘ilishda kun tartibidagi uchinchi masala – “Infratuzilma va ijtimoiy barqarorlik” jamg‘armasi mablag‘lari hisobidan shaharda amalga oshirilishi rejalashtirilgan qurilish va obodonlashtirish ishlari uchun mablag‘ ajratish masalasi ko‘rib chiqildi.

Mazkur masala yuzasidan mas’ul mutasaddi tomonidan deputatlarga quyidagi takliflar yuzasidan hisobot o‘qib eshittirildi:

“Abdulla Avloniy”, “Jayhun” va “Bo‘ston” mahallalari hududidagi ko‘p qavatli uylarning tashqi hamda ichki devorlarini bo‘yoqlash ishlari uchun 200 million so‘m mablag‘ ajratish;

“Kokildorota” mahallasi hududidan o‘tuvchi avtomobil yo‘li bo‘ylab Qirqqiz qal’asiga olib boruvchi 1,5 kilometr uzunlikdagi zamonaviy piyodalar yo‘lagi qurish, himoya panjaralari o‘rnatish hamda “Bog‘ishamol” mahallasi Farovon massivi hududida aholi uchun qulay infratuzilma yaratish ishlari uchun 400 million so‘m mablag‘ ajratish;

“Kokildorota” mahallasi hududidan o‘tuvchi avtomobil yo‘li bo‘ylab 1,5 kilometr uzunlikdagi zamonaviy piyodalar yo‘lagi va himoya panjaralari qurilishi bo‘yicha qo‘shimcha ishlarni amalga oshirish uchun 100 million so‘m mablag‘ ajratish.

Shu tariqa, mazkur loyihalarni moliyalashtirish uchun “Infratuzilma va ijtimoiy barqarorlik” jamg‘armasi hisobidan jami 700 million so‘m mablag‘ ajratish taklifi deputatlar tomonidan atroflicha muhokama qilindi.

Muhokamalar davomida ushbu mablag‘lar hisobidan amalga oshiriladigan obodonlashtirish va infratuzilma loyihalari aholining turmush sifatini yaxshilash, hududlarning zamonaviy qiyofasini shakllantirish, piyodalar xavfsizligini ta’minlash hamda qulay yashash muhitini yaratishga xizmat qilishi ta’kidlandi.

Yig‘ilish yakunida mazkur masalani Xalq deputatlari Termiz shahar Kengashining navbatdagi sessiyasida ko‘rib chiqish yuzasidan doimiy komissiyaning tegishli xulosasi qabul qilindi.