Xalq deputatlari Marg‘ilon shahar Kengashi deputati S.Jo‘rayeva tomonidan saylov okrugidagi "Nurafshon" MFY Amindaryo ko‘chasi aholisi nomidan ichimlik suvi ta’minotiga oid kelib tushgan murojaat yuzasidan o‘rganish ishlari olib borildi.

O‘rganish davomida deputat hududga chiqib, murojaatda qayd etilgan holatlar bilan yaqindan tanishdi. Xususan, ichimlik suvi tarmog‘idagi suv taqsimlash vintellari (zadvijka va ventillar) uzoq yillar davomida foydalanilgani sababli texnik jihatdan nosoz holatga kelgani, bu esa tarmoqni boshqarish hamda avariya-ta’mirlash ishlarini amalga oshirishda qiyinchiliklar tug‘dirayotgani aniqlandi.

Shuningdek, deputat ushbu masala yuzasidan ko‘cha boshilari bilan uchrashib, murojaatda ko‘tarilgan muammolarni atroflicha muhokama qildi. Suhbat davomida mavjud nosozliklarni bartaraf etish, ichimlik suvi ta’minotining barqarorligini ta’minlash hamda kelgusida yuzaga kelishi mumkin bo‘lgan avariya holatlarining oldini olish bo‘yicha taklif va mulohazalar tinglandi.

O‘rganish yakunlari bo‘yicha murojaatda ko‘rsatilgan masalalarni mutasaddi tashkilotlar bilan hamkorlikda hal etish, suv taqsimlash uskunalarining texnik holatini o‘rganish hamda zaruratga ko‘ra ularni ta’mirlash yoki yangisiga almashtirish yuzasidan tegishli choralar ko‘rilishi belgilandi.

Xalq deputatlari Marg‘ilon shahar Kengashi deputatlari tomonidan fuqarolar murojaatlarini joyiga chiqqan holda o‘rganish, aholi bilan ochiq muloqot qilish va ularning qonuniy manfaatlarini himoya qilish borasidagi ishlar davom ettirilmoqda.