Deputat A.Kamolov va kotibiyat mutaxassisi Sh.Ergasheva "Oqostona"da:
Sessiya qarori bilan tasdiqlangan "Open budjet" loyihasi doirasida asfaltlangan yoʻllar koʻzdan kechirildi

"Oqostona" mahalla fuqarolar yigʻinida aholi murojaatlari ijrosi va mahalla infratuzilmasini rivojlantirish masalalariga bagʻishlangan ochiq muloqot uchrashuvi boʻlib oʻtdi.

Uchrashuvda O‘zMTPdan saylangan xalq deputatlari Uzun tuman Kengashi 18-Oqostona saylov okrugi deputati A.Kamolov hamda xalq deputatlari Uzun tuman Kengashi kotibiyati bosh mutaxassisi Sh.Ergasheva ishtirok etishdi. Ular aholidan ilgari kelib tushgan murojaatlarning tegishli tashkilotlar tomonidan ijro etilish holatini bevosita joyiga chiqqan holda oʻrgandilar.

Sessiya qarori bilan tasdiqlangan loyiha amalda

Oʻrganishlar davomida asosiy eʼtibor mahalladagi yoʻllarning holatiga qaratildi. Quvonarlisi, "Oqostona" MFY aholisining faolligi tufayli gʻolib boʻlgan "Open budjet" (Tashabbusli budjet) loyihasi xalq deputatlari Uzun tuman Kengashining tegishli sessiyasi qarori bilan tasdiqlangan va hayotga tatbiq etilgan edi.

Bugungi kunda ushbu sessiya qarori ijrosini taʼminlash doirasida mahallaning ichki yoʻllarini asfalt qilish ishlari muvaffaqiyatli yakuniga yetkazildi.

Deputat A.Kamolov va mutaxassis Sh.Ergasheva bajarilgan ishlarning sifati hamda xalqning ushbu oʻzgarishlardan qay darajada mamnunligini oʻrgandilar. Yillar davomida loy va chang boʻlgan koʻchalarning ravon koʻrinishga kelgani mahalla ahliga juda katta qulaylik yaratdi.